កម្មករ Archives - Millions times

ក្រសួងការងារ៖ ជិត ៨០% នៃកម្មកររោងចក្រតូយ៉ូតា ស៊ុយស៊ូ ជាអតីតសិស្ស TVET

Manuk Bee — Tue, 04 Aug 2026 08:26:58 +0000

ភ្នំពេញ៖ ជិត ៨០% នៃកម្មករនិយោជិតដែលបម្រើការងារផ្នែកផ្គុំ និងដំឡើងរថយន្តនៅក្រុមហ៊ុន តូយ៉ូតា ស៊ុយស៊ូ មេនូហ្វេកឆឺរីង (ខេមបូឌា) ឯ.ក (Toyota Tsusho Manufacturing (Cambodia) Co., Ltd) គឺជាសិស្សដែលបានបញ្ចប់ការសិក្សាពីគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ដែលបង្ហាញពីការតភ្ជាប់រវាងការបណ្តុះបណ្តាលជំនាញ និងតម្រូវការកម្លាំងពលកម្មក្នុងវិស័យឧស្សាហកម្មនៅកម្ពុជា។

ទិន្នន័យនេះត្រូវបានបង្ហាញក្នុងឱកាសឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងថ្នាក់ដឹកនាំក្រសួង អញ្ជើញចុះជួបសំណេះសំណាល សួរសុខទុក្ខ និងទទួលទានអាហារថ្ងៃត្រង់ជាមួយកម្មករនិយោជិតនៅរោងចក្រ តូយ៉ូតា ស៊ុយស៊ូ មេនូហ្វេកឆឺរីង ស្ថិតក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នាព្រឹកថ្ងៃទី៣ ខែសីហា ឆ្នាំ២០២៦។

រោងចក្រ តូយ៉ូតា ស៊ុយស៊ូ មេនូហ្វេកឆឺរីង បានបើកដំណើរការកាលពីថ្ងៃទី២ ខែឧសភា ឆ្នាំ២០២៤ ហើយបច្ចុប្បន្នមានកម្មករនិយោជិតចំនួន ១៤២នាក់ ក្នុងនោះមានស្ត្រី ២៤នាក់។ ក្នុងចំណោមកម្មករដែលបម្រើការងារផ្នែកផ្គុំ និងដំឡើងរថយន្ត ប្រមាណជិត ៨០% ជាសិស្សដែលបានបញ្ចប់ការសិក្សាពីគ្រឹះស្ថាន TVET។

ក្នុងឱកាសនោះ ឯកឧត្តម ហេង សួរ បានបង្ហាញក្តីរីករាយចំពោះការដែលកម្មករនិយោជិតនៅរោងចក្រភាគច្រើនបានបញ្ចប់ការសិក្សាពីគ្រឹះស្ថាន TVET ដោយចាត់ទុកថាជាមោទនភាពសម្រាប់យុវជនខ្មែរផ្ទាល់ សម្រាប់វិស័យ TVET និងសម្រាប់ប្រទេសជាតិ។

ឯកឧត្តម បានលើកឡើងថា ការដែលកូនខ្មែរចូលរួមក្នុងការផ្គុំ និងដំឡើងរថយន្តតូយ៉ូតា ដែលជាម៉ាករថយន្តមានគុណភាព និងពេញនិយមប្រើប្រាស់នៅកម្ពុជា បង្ហាញពីសមត្ថភាពរបស់កម្លាំងពលកម្មកម្ពុជាដែលមានជំនាញបច្ចេកទេស និងវិជ្ជាជីវៈ។

ឯកឧត្តមរដ្ឋមន្ត្រីបានលើកទឹកចិត្តឱ្យកម្មករនិយោជិតបន្តចូលរួមសិក្សាជំនាញវិជ្ជាជីវៈកម្រិតខ្ពស់បន្ថែមទៀតនៅគ្រឹះស្ថាន TVET ដោយឆ្លៀតពេលពីការងារ។ លោកក៏បានផ្តាំផ្ញើឱ្យកម្មករបន្តយកចិត្តទុកដាក់បំពេញការងារ និងលើកកម្ពស់ជំនាញវិជ្ជាជីវៈ ដើម្បីបង្កើនផលិតភាពការងារ និងចូលរួមដល់ការអភិវឌ្ឍរោងចក្រ និងសេដ្ឋកិច្ចជាតិ។

ជាមួយគ្នានេះ ឯកឧត្តម ហេង សួរ បានបញ្ជាក់ពីការខិតខំប្រឹងប្រែងរបស់ក្រសួងការងារ ក្នុងការធានាសុខដុមរមនាក្នុងទំនាក់ទំនងវិជ្ជាជីវៈ តាមរយៈការពង្រឹងទំនាក់ទំនងរវាងកម្មករនិយោជិត និងម្ចាស់សហគ្រាស រោងចក្រ ដើម្បីរួមគ្នាដោះស្រាយបញ្ហាដែលកើតមាន និងចៀសវាងវិវាទការងារដែលអាចនាំទៅដល់ការធ្វើកូដកម្មខុសនីតិវិធីច្បាប់។

ឯកឧត្តមរដ្ឋមន្ត្រីក៏បានវាយតម្លៃខ្ពស់ចំពោះម្ចាស់រោងចក្រ ដែលបានផ្តល់ឱកាសការងារដល់ប្រជាពលរដ្ឋ និងអនុវត្តច្បាប់ស្តីពីការងារបានល្អប្រសើរ ព្រមទាំងផ្តល់អត្ថប្រយោជន៍ផ្សេងៗជូនកម្មករនិយោជិត។ រោងចក្រនេះក៏មានប្រព័ន្ធគ្រប់គ្រងដោយបច្ចេកវិទ្យា និងកន្លែងធ្វើការដែលមានផាសុកភាព។

ក្រសួងការងារនឹងបន្តកិច្ចសហការជាមួយក្រុមហ៊ុន ដើម្បីផ្តល់ឱកាសឱ្យកម្មករនិយោជិតទទួលបានការបណ្តុះបណ្តាលបន្ថែម ឱកាសការងារ និងប្រាក់ចំណូលកាន់តែប្រសើរ។

លោកឧកញ៉ា គង់ នួន ម្ចាស់រោងចក្រ បានថ្លែងអំណរគុណចំពោះឯកឧត្តមរដ្ឋមន្ត្រី និងថ្នាក់ដឹកនាំក្រសួង ដែលបានអញ្ជើញចុះសួរសុខទុក្ខកម្មករនិយោជិតដោយផ្ទាល់។ លោកបានចាត់ទុកវត្តមានរបស់ថ្នាក់ដឹកនាំក្រសួងថា ជាការបង្ហាញពីការយកចិត្តទុកដាក់របស់រាជរដ្ឋាភិបាល និងក្រសួងចំពោះសុខុមាលភាព និងលក្ខខណ្ឌការងាររបស់កម្មករនិយោជិត ព្រមទាំងជាកម្លាំងលើកទឹកចិត្តដល់រោងចក្រ ក្នុងការបន្តសហការជាមួយក្រសួង និងអភិវឌ្ឍវិស័យឧស្សាហកម្មនៅកម្ពុជា។

រោងចក្រ តូយ៉ូតា ស៊ុយស៊ូ មេនូហ្វេកឆឺរីង បានបើកដំណើរការកាលពីថ្ងៃទី២ ខែឧសភា ឆ្នាំ២០២៤។ បច្ចុប្បន្ន រោងចក្រមានកម្មករនិយោជិតចំនួន ១៤២នាក់ ក្នុងនោះស្ត្រី ២៤នាក់។

ក្រៅពីការងារ កម្មករនិយោជិតនៅរោងចក្រទទួលបានលក្ខខណ្ឌការងារ និងអត្ថប្រយោជន៍ផ្សេងៗ រួមមានកន្លែងទទួលទានអាហារ និងថ្លៃបាយថ្ងៃត្រង់ចំនួន ២ពេលក្នុងមួយថ្ងៃ ព្រមទាំងអត្ថប្រយោជន៍ពីបេឡាជាតិសន្តិសុខសង្គម (ប.ស.ស.)។ លក្ខខណ្ឌសុវត្ថិភាព និងសុខភាពការងារនៅរោងចក្រក៏ត្រូវបានរៀបចំតាមស្តង់ដារខ្ពស់ផងដែរ។

ការដែលជិត ៨០% នៃកម្មករផ្នែកផ្គុំ និងដំឡើងរថយន្តនៅរោងចក្រជាអតីតសិស្ស TVET បានបង្ហាញពីតួនាទីកាន់តែសំខាន់របស់ការបណ្តុះបណ្តាលជំនាញ ក្នុងការរៀបចំកម្លាំងពលកម្មកម្ពុជាឱ្យឆ្លើយតបនឹងតម្រូវការរបស់វិស័យឧស្សាហកម្ម និងបង្កើនឱកាសការងារដែលមានជំនាញសម្រាប់យុវជនកម្ពុជា៕

អត្ថបទ៖ ប៊ី

តាមដានជាមួយយើង៖ Million Times

The post ក្រសួងការងារ៖ ជិត ៨០% នៃកម្មកររោងចក្រតូយ៉ូតា ស៊ុយស៊ូ ជាអតីតសិស្ស TVET appeared first on Millions times.

ចិន ផ្តល់រោងជាងឌីជីថលនិងបញ្ញាសិប្បនិម្មិតដើម្បីពង្រឹងសមត្ថភាពពលកម្មជំនាញបង្កើនការទាក់ទាញវិនិយោគិន

Vin Chang — Fri, 16 May 2025 02:11:50 +0000

ក្រសួងការងារ និងបណ្តុះបណ្តាលវិជ្ជាជីវៈ បានសម្ពោធរោងជាងឌីជីថល និងបញ្ញាសិប្បនិម្មិត នៅវិទ្យាស្ថានជាតិពហុបច្ចេកទេសកម្ពុជា (NPIC) កាលពីថ្ងៃទី១៣ ខែឧសភា ឆ្នាំ២០២៥ ដែលនឹងធ្វើឱ្យយុវជនកម្ពុជាកាន់តែមានសមត្ថភាពជំនាញកាន់តែខ្ពស់បន្ថែមទៀត។

តាមដានជាមួយយើង៖ Million Times

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា សមិទ្ធផលរោងជាងឌីជីថល និងបញ្ញាសិប្បនិម្មិតនេះ នឹងធ្វើឱ្យយុវជនកម្ពុជា និយាយជារួម និងសិស្ស-និស្សិត ដែលសិក្សានៅវិទ្យាស្ថាន NPIC និយាយដោយឡែក កាន់តែមានសមត្ថភាពជំនាញកាន់តែខ្ពស់បន្ថែមទៀត ដែលស្របទៅតាមតម្រូវការទីផ្សារការងារ ដែលកំពុងសម្បូរបែប ក្នុងបរិបទបច្ចេកវិទ្យាទំនើបនាពេលបច្ចុប្បន្ន។ លោកថា ការខិតខំបំពាក់បំប៉នដល់សិស្ស-និស្សិតកម្ពុជានូវជំនាញឌីជីថល និងបញ្ញាសិប្បនិម្មិតនេះដែរ ក៏ជាគន្លឹះសំខាន់មួយ ក្នុងការបង្កើនការទាក់ទាញវិនិយោគិនពីបរទេសឱ្យមកបណ្ដាក់ទុនវិនិយោគនៅកម្ពុជាផងដែរ។

លោកបានសង្កត់ធ្ងន់ថា៖ «ប្រសិនជាគ្មានការរីកចម្រើនផ្នែកធនធានមនុស្សជំនាញបច្ចេកទេស និងវិជ្ជាជីវៈ និងផលិតភាពនោះទេកម្ពុជាក៏មិនអាចពង្រីកឧត្តមភាពនៃការប្រកួតប្រជែងជាមួយបណ្ដាប្រទេសនានា ក្នុងការទាក់ទាញគម្រោងវិនិយោគថ្មីៗនោះឡើយ»។

សូមជម្រាបថា រោងជាងឌីជីថល និងបញ្ញាសិប្បនិម្មិត គឺជាអំណោយរបស់ក្រុមហ៊ុន Jiangsu Huibo Robotics Technology ដល់វិទ្យាស្ថានជាតិពហុបច្ចេកទេសកម្ពុជា (NPIC) ដែលធ្វើឱ្យវិទ្យាស្ថានដ៏ទំនើបរបស់ក្រសួងការងារ និងបណ្តុះបណ្តាលវិជ្ជាជីវៈមួយនេះកាន់តែទំនើប និងមានសមត្ថភាពកាន់តែខ្ពស់ ក្នុងការបណ្តុះបណ្តាលជំនាញដល់ប្រជាពលរដ្ឋខ្មែរបន្ថែមទៀត។

ជាមួយគ្នានេះដែរ លោករដ្ឋមន្ត្រី ក៏បានរំលេចផងដែរថា វត្តមាននៃជំនួយរបស់ក្រុមហ៊ុនទំនើបរបស់ចិននេះ នឹងក្លាយជាធ្នាក់នាំយកក្រុមហ៊ុនវិនិយោគចិនធំៗ ឱ្យមកកម្ពុជា កាន់តែច្រើនបន្ថែមទៀត៕

អត្ថបទ៖ ពិសិដ្ឋ រូបភាព៖ ក្រុមព័ត៌មានក្រសួងការងារ

The post ចិន ផ្តល់រោងជាងឌីជីថលនិងបញ្ញាសិប្បនិម្មិតដើម្បីពង្រឹងសមត្ថភាពពលកម្មជំនាញបង្កើនការទាក់ទាញវិនិយោគិន appeared first on Millions times.

ឆ្នាំ២០២៥ កំណត់ឲ្យកម្មកររោងចក្រទទួលបានប្រាក់ប្រចាំខែ ២០៨ដុល្លារ

Vin Chang — Thu, 19 Sep 2024 09:08:45 +0000

ប្រាក់ឈ្នួលអប្បបរមាថ្មីសម្រាប់ឆ្នាំ២០២៥ គឺ ២០៨ដុល្លារក្នុង ១ខែ ដែលចំនួននេះមានការកើនឡើង ៤ដុល្លារ បើប្រៀបធៀបនឹងឆ្នាំ២០២៤ ដែលមានត្រឹមតែ ២០៤ដុល្លារប៉ុណ្ណោះ។ នេះបើតាមការឲ្យដឹងលើទំព័រហ្វេសប៊ុករបស់សម្តេច ហ៊ុន ម៉ាណែត នាយករដ្ឋមន្រ្តី។

សម្តេចនាយករដ្ឋមន្រ្តី បានឲ្យដឹងថា តាមរយៈការបោះឆ្នោតសំឡេងភាគច្រើនលើសលប់ ៤៦ លើ ៥១សំឡេង បានគាំទ្រតួលេខ ២០៦ដុល្លារ ជាលទ្ធផលនៃការចរចាប្រាក់ឈ្នួលអប្បបរមាសម្រាប់ឆ្នាំ២០២៥ ដែលមានលោក ហេង សួរ រដ្ឋមន្ត្រីក្រសួងការងារ និង បណ្ដុះបណ្ដាលវិជ្ជាជីវៈ ជាប្រធានក្រុមប្រឹក្សាជាតិប្រាក់ឈ្នួលអប្បបរមា។

តាមដានជាមួយយើង៖ Million Times

ទោះជាយ៉ាងនេះក៏ដោយ សម្តេច ហ៊ុន ម៉ាណែត បានផ្ដល់គោលការណ៍ទៅលោក ហេង សួរ ឱ្យបន្ថែម ២ដុល្លារ លើតួលេខ ២០៦ដុល្លារ ដែលជាលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា។ ដូច្នេះ ប្រាក់ឈ្នួលអប្បបរមាថ្មីសម្រាប់ឆ្នាំ២០២៥ គឺ ២០៨ដុល្លារ ក្នុង ១ខែ កើនឡើង ៤ដុល្លារ បើប្រៀបធៀបនឹងឆ្នាំ២០២៤ ដែលមានត្រឹមតែ ២០៤ដុល្លារ។ ជាមួយគ្នានេះ សម្តេចបានឱ្យក្រសួងការងារ និងបណ្តុះបណ្តាលវិជ្ជាជីវៈ ធ្វើការផ្សព្វផ្សាយ និងជូនដំណឹងដល់បងប្អូនកម្មករនិយោជិត ក៏ដូចជាសាធារណជនឱ្យបានជ្រាបជាព័ត៌មាន។

សម្តេចបានបញ្ជាក់ថា ទោះក្នុងកាលៈទេសៈលំបាកនៃសេដ្ឋកិច្ចសកលក៏ដោយ ក៏រាជរដ្ឋាភិបាលមិនភ្លេចយកចិត្តទុកដាក់ដល់ការលើកកម្ពស់ជីវភាពរស់នៅ មុខរបរ និងសុខុមាលភាពរបស់បងប្អូនប្រជាពលរដ្ឋគ្រប់ស្រទាប់វណ្ណៈ។ ជាក់ស្តែង ការដំឡើងប្រាក់ឈ្នួលអប្បបរមាឆ្នាំនេះ ទោះតិចក្តីច្រើនក្តី គឺដើម្បីជួយសម្រួលដល់ការលំបាកខ្លះរបស់បងប្អូនកម្មករនិយោជិតនៃយើង។

សម្តេចបន្តថា ក្នុងឆ្នាំ២០២៤នេះ ប្រទេសជាច្រើននៅក្នុងតំបន់មិនមានការដំឡើងប្រាក់ឈ្នួលអប្បបរមាទេ ដោយសារស្ថានភាពសេដ្ឋកិច្ចមិនទាន់ល្អប្រសើរ ហើយប្រាក់ឈ្នួលអប្បបរមា ដែលគិតជាប្រាក់ដុល្លារអាមេរិកនៃប្រទេសមួយចំនួនមិនត្រឹមតែមិនកើនទេ គឺថែមទាំងថយទាបជាងចុងឆ្នាំ២០២៣ ទៅវិញ ដោយសារតែការប្រែប្រួលនៃអត្រាប្តូរប្រាក់នៃប្រទេសទាំងនោះ។

ទន្ទឹមនឹងការដំឡើងប្រាក់ឈ្នួលនេះសម្តេចនាយករដ្ឋមន្រ្តីសូមជម្រាបជូនបងប្អូនកម្មករនិយោជិត និងសាធារណជនថា សម្តេចនឹងបន្តជំរុញដល់ក្រសួង ស្ថាប័ន អាជ្ញាធរពាក់ព័ន្ធពិនិត្យ តាមដាន និងដាក់វិធានការបន្ថែម ដើម្បីពិនិត្យលទ្ធភាពកាត់បន្ថយបន្ទុកចំណាយរបស់បងប្អូនកម្មករនិយោជិត។

បន្ថែមពីនេះ សម្តេចក៏បានវាយតម្លៃដល់គ្រប់ភាគីពាក់ព័ន្ធ ជាពិសេស ភាគីតំណាងបងប្អូនកម្មករនិយោជិត និងតំណាងនិយោជក ដែលបានខិតខំពិភាក្សាប្រាក់ឈ្នួលអប្បបរមាឆ្នាំនេះប្រកបដោយវិជ្ជាជីវ: និងស្មារតីរួម៕

អត្ថបទ៖ សេដ្ឋានី រូបភាព៖ ក្រសួងការងារ

The post ឆ្នាំ២០២៥ កំណត់ឲ្យកម្មកររោងចក្រទទួលបានប្រាក់ប្រចាំខែ ២០៨ដុល្លារ appeared first on Millions times.

កម្មករ Archives - Millions times

ក្រសួង​ការងារ​៖ ​ជិត​ ​៨០​% ​នៃ​កម្មករ​រោងចក្រ​តូយ៉ូតា ​ស៊ុយ​ស៊ូ ​ជា​អតីត​សិស្ស​ ​TVET​

ចិន ផ្តល់រោងជាងឌីជីថលនិងបញ្ញាសិប្បនិម្មិតដើម្បីពង្រឹងសមត្ថភាពពលកម្មជំនាញបង្កើនការទាក់ទាញវិនិយោគិន

ឆ្នាំ២០២៥ កំណត់ឲ្យកម្មកររោងចក្រទទួលបានប្រាក់ប្រចាំខែ ២០៨ដុល្លារ

ក្រសួងការងារ៖ ជិត ៨០% នៃកម្មកររោងចក្រតូយ៉ូតា ស៊ុយស៊ូ ជាអតីតសិស្ស TVET