ប្រធានព្រឹទ្ធសភាសម្តេច ហ៊ុន សែន បានប្រកាសដាក់ឲ្យប្រើប្រាស់បណ្តាញទំនាក់ទំនងសង្គម Chat លើកដំបូងរបស់កម្ពុជា ដែលមានលក្ខណៈស្តង់ដារបរទេសដូច Telegram និង WhatsApp មានឈ្មោះថា CoolApp ដែលបច្ចុប្បន្នបានដាក់ដំណើរការនៅលើ​ App Store និង Play Store។

បើតាមទំព័រហ្វេសប៊ុកផេកសម្តេច ហ៊ុន សែន នៅរសៀលថ្ងៃទី២១ ខែមិថុនានេះ CoolApp មានលក្ខណៈស្តង់ដារដូចអន្តរជាតិ ធ្វើឡើងដោយក្រុមជំនួញបច្ចេកទេសខ្មែរជាច្រើននាក់ ដែលជាអ្នកជំនាញផ្នែកបច្ចេកវិទ្យា IT។ កម្មវិធីទំនាក់ទំនងឆាត CoolApp នេះបានចំណាយពេលជាង៣ឆ្នាំមកហើយ ចាប់តាំងពីឆ្នាំ២០២១ មកដល់ឆ្នាំ២០២៤នេះ ដែលទើបចេញរូបរាងនៅពេលនេះ។

តាមដានជាមួយយើង៖ Million Times

ប្រភពខាងលើបញ្ជាក់ថា CoolApp មានមុខងារជាច្រើនរួមមាន Chat និង Call និង Video Call ដោយប្រើប្រាស់តាមស្តង់ដារអន្តរជាតិ ទិន្នន័យ Data និង Call ស្ថិតក្នុងលក្ខណៈ Encryption និងសុវត្ថិភាពទាំងអស់ ដោយប្រើប្រាស់ប្រព័ន្ធ Internet Local (Dix) ដែលធ្វើឲ្យ Call ស្តាប់សំឡេងច្បាស់ និង Chat ផ្ញើរូបភាព វិដេអូ មានភាពរហ័ស ព្រោះ Internet មិនចេញទៅក្រៅប្រទេស។

តាមរយៈដាក់ឲ្យប្រើប្រាស់បណ្តាញទំនាក់ទំនងសង្គមឆាត CoolApp សម្តេច ហ៊ុន សែន បានគូសបញ្ជាក់ថាជាមោទនភាពរបស់ជាតិយើង ដែលជា​កម្មវិធីដំបូងជារបស់ខ្មែរ និងប្រើប្រាស់ក្នុងដែនសុវត្ថិភាពរបស់ខ្មែរ។

អត្ថបទ៖ សេដ្ឋានី រូបភាព៖ ផេកសម្តេចតេជោ