អ្នកជំនាញបានបង្ហាញទស្សនៈយល់ឃើញថា ការគាំទ្រ និងការលើកទឹកចិត្តរបស់រាជរដ្ឋាភិបាលមកលើវិស័យអចលនទ្រព្យ ពិតជាមានសំខាន់ក្នុងការជួយជំរុញឲ្យមានសកម្មភាពឡើងវិញ ក៏ព្រោះថារាជរដ្ឋាភិបាលបានដឹងច្បាស់ថា វិស័យអចលនទ្រព្យជាវិស័យដ៏សំខាន់ដែលជួយរុញសេដ្ឋកិច្ចកម្ពុជាឲ្យមានភាពរឹងមាំ និងមានភាពរីកចម្រើន។

សម្តេច ហ៊ុន ម៉ាណែត បានថ្លែងដោយក្តីសង្ឃឹមថា វិធានការលើកទឹកចិត្តផ្នែកពន្ធដារ នឹងជួយគាំទ្រ និងបង្កលក្ខណៈដល់ក្រុមហ៊ុនអភិវឌ្ឍន៍លំនៅឋាន អ្នកវិនិយោគ និងប្រជាពលរដ្ឋជាម្ចាស់អចលនទ្រព្យ ក្នុងការចូលរួមចំណែកជាមួយរាជរដ្ឋាភិបាលដើម្បីអភិវឌ្ឍវិស័យអចលនទ្រព្យ និងសេដ្ឋកិច្ចកម្ពុជាឱ្យកាន់តែរីកចម្រើនរឹងមាំបន្ថែមទៀត។

អ្នកជំនាញអចលនទ្រព្យ និងជាប្រធានសម្ព័ន្ធសាជីវកម្ម SAM SN Group អ្នកឧកញ៉ា សំ សុខនឿន បានសម្តែងនូវការអបអរសាទរ និងមានជំនឿចិត្តយ៉ាងខ្ពស់ថា ការដាក់ចេញយុទ្ធសាស្រ្តលើកទឹកចិត្តនានារបស់រាជរដ្ឋាភិបាល ពិសេសផ្នែកពន្ធនឹងធ្វើឲ្យវិស័យអចលនទ្រព្យមានសកម្មភាពល្អប្រសើរជាងមុន ប៉ុន្តែអ្នកជំនាញដដែលរូបនេះបានបញ្ជាក់ ដើម្បីស្ថានភាពអចលនទ្រព្យប្រសើរឡើងវិញដូចកាលមុនវិបត្តិកូវីដ១៩ និងវិបត្តិសេដ្ឋកិច្ច គឺត្រូវការពេលវេលាប្រហែលជា ៥ឆ្នាំទៀតឯណោះ។

អ្នកឧកញ៉ា សំ សុខនឿន មានប្រសាសន៍ថា៖ «ថ្មីៗនេះរាជរដ្ឋាភិបាលបានដាក់គោលនយោបាយល្អៗបន្ថែមទៀតជាមួយនឹងការអនុគ្រោះពន្ធ និងពន្យាពន្ធជាច្រើន ដើម្បីជួយជំរុញវិស័យអចលនទ្រព្យឲ្យមានភាពប្រសើរឡើង។ ខ្ញុំជឿថា ការដាក់យុទ្ធសាស្រ្តបែបនេះគឺនឹងធ្វើឲ្យវិស័យអចលនទ្រព្យកម្ពុជាមានភាពល្អប្រសើរជាងមុន ប៉ុន្តែយើងត្រូវការពេលវេលាខ្ទង់ ៥ឆ្នាំទៅមុខ ដើម្បីលើកស្ទួយ និងជំរុញវិស័យអចលនទ្រព្យមានស្ថានភាពល្អដូចកាលមុនវិបត្តិកូវីដ១៩»។

អ្នកជំនាញដែលមានបទពិសោធជាង ១០ឆ្នាំ អ្នកឧកញ៉ា សំ សុខនឿន បានបង្ហាញនូវកត្តាចំនួន ២ធំៗដែលនឹងចូលរួមចំណែកទាញឲ្យវិស័យអចលនទ្រព្យមានសកម្មភាពល្អឡើងវិញ។

អ្នកឧកញ៉ាថ្លែងថា៖ «កក្តា ២ធំៗដែលចូលរួមចំណែកដ៏សំខាន់បំផុតដើម្បីឲ្យវិស័យអចលនទ្រព្យនៃប្រទេសកម្ពុជារបស់យើងរីកចម្រើន ទី១ ការវិនិយោគពីក្រៅស្រុកមកក្នុងប្រទេសកម្ពុជា។ ប្រសិនបើអ្នកវិនិយោគបរទេស ដូចវិនិយោគិនចិន អាមេរិក ឬប្រទេសតំបន់អ៉ឺរ៉ុបផ្សេងទៀតមកកម្ពុជា សកម្មភាពទិញលក់នឹងមានចរន្តសាច់ប្រាក់ឡើងវិញ តាមរយៈការទិញលក់បន្តជាដើម។ និងទី២ ចំណូលក្នុងស្រុក។ បើប្រជាពលរដ្ឋរបស់យើងមានប្រាក់ចំណូលច្រើនជាងមុន ប្រសើរជាងមុន ពួកគាត់ចាប់ផ្តើមមានលុយ ប្រាកដជាគាត់យកលុយទៅវិនិយោគលើអចលនទ្រព្យ។ ការណ៍នេះ សកម្មភាព និងចរន្តសាច់ប្រាក់ក្នុងវិស័យអចលនទ្រព្យនឹងចាប់ផ្តើមមានស្ថានភាពល្អប្រសើរឡើងវិញផងដែរ»។

គួរឲ្យដឹងថា កន្លងទៅថ្មីៗនេះ ដើម្បីជួយលើវិស័យអចលនទ្រព្យ រាជរដ្ឋាភិបាល បានជួបជាមួយតំណាងធនាគារ និងស្ថាប័នហិរញ្ញវត្ថុនៅកម្ពុជា ហើយបានគាំទ្រលើគោលការណ៍ និងឯកភាពបន្ធូរបន្ថយការប្រាក់លើកម្ចីសម្រាប់ការអភិវឌ្ឍលំនៅឋាន និងទិញអចលនទ្រព្យ មកត្រឹម ៨% ក្នុងមួយឆ្នាំ ដែលអត្រាការប្រាក់ថ្មីនេះ នឹងផ្តល់ឱ្យអតិថិជន ទិញលំនៅឋាននូវលទ្ធភាពអនុវត្តកាតព្វកិច្ចសងត្រឡប់ កាន់តែមានភាពងាយស្រួល ដែលនឹងផ្តល់ឱ្យអតិថិជនក៏ដូចជា ស្ថាប័នហិរញ្ញវត្ថុ បន្តដំណើរការទូទាត់កាន់តែមានសុវត្ថិភាព និងងាយស្រួល។

លើសពីនេះ តំណាងធនាគារ និងស្ថាប័នហិរញ្ញវត្ថុ ក៏បានឯកភាពផ្តល់កម្ចីដែលមានការប្រាក់ទាបលើវិស័យអចលនទ្រព្យ នឹងកាត់បន្ថយវិវាទដែលកើតឡើង ដោយសារ អតិថិជនគ្មានលទ្ធភាពបំពេញកាតព្វកិច្ច ហើយការអនុវត្តគោលការណ៍ នឹងឈានទៅបញ្ចប់វិវាទបុរី ក៏ដូចជាការបើកទំព័រថ្មី សម្រាប់ការងើបឡើងនូវវិស័យអចលនទ្រព្យ និងការទិញលក់លំនៅឋាន៕

អត្ថបទ៖ សាងតេជៈ រូបភាព៖ ប្រអប់ខ្មៅ