រដ្ឋាភិបាលអាមេរិកបានព្រមានទៅកាន់បុគ្គលិករបស់ខ្លួន ដែលកំពុងបំពេញភារកិច្ចនៅប្រទេសចិន ហាមផ្ដាច់មិនឲ្យមានទំនាក់ទំនងស្នេហា ជាមួយជនជាតិចិនជាដាច់ខាត។ នេះបើតាមការឲ្យដឹងពីទីភ្នាក់ងារព័ត៌មាន AP។
Million Times 
បុគ្គល ៤រូបដែលដឹងពីព័ត៌មាននេះ បានលួចប្រាប់ AP ក្នុងលក្ខខណ្ឌលាក់អត្តសញ្ញាណថា ច្បាប់មួយនេះបានចូលជាធរមាន បន្ទាប់ពីឯកអគ្គរដ្ឋទូតសហរដ្ឋអាមេរិក Nicholas Burns បានចាកចេញពីប្រទេសចិន កាលពីខែមករាមកម៉្លេះ។
គោលនយោបាយថ្មីនេះ នឹងត្រូវអនុវត្តចំពោះបុគ្គលិករដ្ឋាភិបាលទាំងអស់ ដែលកំពុងបម្រើការនៅប្រទេសចិន រួមទាំងស្ថានទូតនៅទីក្រុងប៉េកាំង និងស្ថានកុងស៊ុលនៅទីក្រុងក្វាងចូវ សៀងហៃ សិនយ៉ាង និងវូហាន ព្រមទាំងស្ថានកុងស៊ុលអាមេរិកនៅក្នុងដែនដីពាក់កណ្តាលស្វយ័តហុងកុងថែមទៀត។
ក្នុងនោះក៏មានករណីលើកលែងផងដែរ ចំពោះបុគ្គលិករដ្ឋាភិបាលអាមេរិក ដែលបានរៀបការជាមួយជនជាតិចិន មុនពេលច្បាប់នេះចូលជាធរមាន ដោយពួកគេអាចដាក់ពាក្យស្នើសុំការលើកលែង។
ប៉ុន្តែបើរដ្ឋាភិបាលមិនអនុញ្ញាត ពួកគេត្រូវតែបញ្ចប់ទំនាក់ទំនងស្នេហាជាមួយដៃគូជាជនជាតិចិន ឬលាលែងពីតំណែងក្នុងជួររដ្ឋបាល។ ក្នុងករណីមានអ្នកល្មើសនឹងច្បាប់មួយនេះ ពួកគេត្រូវបញ្ជាឲ្យចាកចេញពីប្រទេសចិនភ្លាមៗ។
សូមជម្រាបដែរថា ពាក់ព័ន្ធនឹងគោលបំណងនៃការបង្កើតច្បាប់ថ្មីនេះ រដ្ឋាភិបាលអាមេរិកមិនបង្ហើបប្រាប់ឡើយ ប៉ុន្តែតាមការវិភាគពីអ្នកតាមដានព្រឹត្តិការណ៍អន្តរជាតិ បានឲ្យដឹងថា វាអាចជាការបញ្ជៀសការបែកធ្លាយព័ត៌មានសំងាត់របស់អាមេរិក តាមរយៈភ្នាក់ងារខ្លួន ដែលមានដៃគូស្នេហាជាជនជាតិចិន៕
អត្ថបទ៖ Luffy រូបភាព៖