ក្រុមហ៊ុនច្បាប់អាមេរិកមិនរកប្រាក់ចំណេញ New Civil Liberties Alliance កាលពីថ្ងៃព្រហស្បតិ៍ ទី០៣ ខែមេសា បានដាក់ពាក្យប្ដឹងរដ្ឋបាលប្រធានាធិបតី Donald Trump ដើម្បីរារាំងពួកគេ ពីការទារពន្ធគយចំពោះទំនិញនាំចូលពីចិន។
Million Times 
ទីភ្នាក់ងារព័ត៌មាន Reuters បានចុះផ្សាយថា ក្រុមហ៊ុនច្បាប់ NCLA បានដាក់ពាក្យបណ្ដឹងទៅតុលាការសហព័ន្ធនៅរដ្ឋ Florida និងបានចោទប្រធានាធិបតី Trump ថា គ្មានសិទ្ធអំណាចផ្លូវច្បាប់គ្រប់គ្រាន់ ដើម្បីដាក់ពន្ធដ៏សម្បើមនេះចំពោះប្រទេសចិនឡើយ។
លោក Andrew Morris ទីប្រឹក្សាវិវាទជាន់ខ្ពស់ប្រចាំ NCLA បាននិយាយថា «តាមរយៈការអំពាវនាវឱ្យមានអំណាចគ្រាអាសន្ន ដើម្បីដាក់ពន្ធលើទំនិញនាំចូលពីប្រទេសចិន ដែលលក្ខន្តិកៈមិនអនុញ្ញាត លោកប្រធានាធិបតី Trump បានប្រើប្រាស់អំណាចនោះខុស រំលោភសិទ្ធិរបស់សភាក្នុងការគ្រប់គ្រងពន្ធគយ និងធ្វើឱ្យមានការខកចិត្តចំពោះការបែងចែកអំណាចនៃរដ្ឋធម្មនុញ្ញ»។
ក្រុមហ៊ុន NCLA បានទាមទារឲ្យតុលាការរារាំងការអនុវត្តវិធានការទារពន្ធគយ របស់រដ្ឋបាលលោក Trump ឬក៏ពន្យារពេលអនុវត្តវា ដោយអះអាងថា ប្រធានាធិបតីអាចបញ្ជាឲ្យមានការទារពន្ធគយបាន លុះត្រាតែទទួលបានការអនុម័តពីសភា និងក្រោមលក្ខន្តិកៈពាណិជ្ជកម្មដ៏ស្មុគស្មាញ ដែលសរសេរពីរបៀប និងពេលណាដែលពួកគេអាចអនុញ្ញាតបានតែប៉ុណ្ណោះ។
មកទល់ពេលនេះ រដ្ឋបាលលោក Trump នៅមិនទាន់ចេញមុខបំភ្លឺជុំវិញរឿងរ៉ាវនេះឡើយ ខណៈពាក្យបណ្ដឹងក៏ស្ថិតនៅក្នុងដៃតុលាការ កំពុងត្រួតពិនិត្យលើការប្ដឹងផ្ដល់មួយនេះដូចគ្នា៕
អត្ថបទ៖ Luffy រូបភាព៖ Los Angeles Times /NCLA