នាយកដ្ឋានភូគព្ភសាស្ត្រ និងរ៉ែវៀតណាម បានប្រកាសកាលពីពេលថ្មីៗថា ពួកគេបានរកឃើញនូវរ៉ែមាសរហូតដល់ ៤០កន្លែង និងសរុបទិន្នផលប្រហែល ៣០តោនឯណោះ។

សារព័ត៌មាន VNExpress ចុះផ្សាយថា រ៉ែមាសទាំងនោះត្រូវបានរកឃើញនូវទីតាំងផ្សេងៗគ្នា ក្នុងខេត្តជាច្រើន រួមមាន នៅខេត្ត Bac Kan និង Tuyen Quang មានរ៉ែមាសថ្មីៗ ៨កន្លែងរៀងៗខ្លួន នៅខេត្ត Lai Chau មានរ៉ែមាស ៥កន្លែង នៅខេត្ត Thanh Hoa និង Nghe An មានរ៉ែមាស ៤កន្លែងរៀងៗខ្លួន នៅខេត្ត Lang Son និង Cao Bang មានរ៉ែមាស ៣កន្លែងរៀងៗខ្លួន នៅខេត្ត Ha Giang និង Yen Bai មានរ៉ែមាស ២កន្លែងរៀងៗខ្លួន និងក្នុងខេត្ត Dien Bien មានរ៉ែមាសមួយកន្លែង។

គួររំលឹកបន្តិចថា កន្លងមករដ្ឋាភិបាលវៀតណាមធ្លាប់អះអាងថា ពួកគេបានកំណត់ឃើញថា មានរ៉ែមាសប្រហែល ៥០០កន្លែង នៅក្នុងប្រទេសរបស់ខ្លួន និងសរុបទិន្នផលមាសពីរ៉ែទាំងនោះ សរុបប្រហែល ៣០០តោន។

ជម្រាបបន្ថែមថា កាលពីឆ្នាំ២០១៧ វៀតណាមបានរៀបចំអ្នកជំនាញមួយក្រុម ដឹកនាំគម្រោងមួយដែលមានឈ្មោះថា គម្រោងភាគពាយ័ព្យ ដែលស្ថិតនៅភាគពាយ័ព្យនៃប្រទេសតែម្ដង ដោយពួកគេអះអាងថា ទីតាំងនៅតំបន់នេះ គឺពោរពេញដោយរ៉ែធម្មជាតិ ជាពិសេសគឺរ៉ែមាស និងប្រាក់៕

អត្ថបទ៖ Luffy រូបភាព៖ Asean Now