ប្រទេសថៃ ដែលជាបងធំសេដ្ឋកិច្ចអាស៊ានទី២ កំពុងព្រួយបារម្ភពីការធ្លាក់ចុះនៃចំនួនភ្ញៀវអន្តរជាតិ ចន្លោះពី១០% ទៅ ១៥% ក្នុងរយៈពេល ២សប្ដាហ៍ខាងមុខ បន្ទាប់ពីរងឥទ្ធិពលនៃគ្រោះរញ្ជួយដីក្នុងទីក្រុងបាងកក ពីប្រទេសមីយ៉ាន់ម៉ាកាលពីពេលថ្មីៗ។

ទីភ្នាក់ងារព័ត៌មាន Bloomberg បានចុះផ្សាយថា ភ្ញៀវទេសចរណ៍បរទេសប្រហែល ១០% បានប្រញាប់ចាកចេញពីប្រទេសថៃ មុនពេលកំណត់កាលពីថ្ងៃសុក្រ ខណៈតាមការស្ទង់មតិបង្ហាញថា ភ្ញៀវបរទេសជាច្រើនទៀត កំពុងព្រួយបារម្ភពីសុវត្ថិភាពរបស់ពួកគេនៅទីក្រុងបាងកក។

គ្រោះរញ្ជួយដីនៅថៃ កើតឡើងចំរដូវកាលទេសចរណ៍ដ៏មមាញឹក ពោលចំពេលរដ្ឋាភិបាលកំពុងរៀបចំព្រឹត្តិការណ៍សង្ក្រានប្រចាំឆ្នាំដ៏ធំ ចាប់ផ្ដើមពីពាក់កណ្ដាលខែមេសា ដើម្បីអូសទាញភ្ញៀវអន្តរជាតិរាប់លាននាក់។ ប៉ុន្តែដោយសារគ្រោះរញ្ជួយដីនេះ បានធ្វើឲ្យផែនការរបស់រដ្ឋាភិបាល កំពុងជួបនូវភាពរាំងស្ទះ និងទំនងជាខាតបង់ទឹកប្រាក់រាប់រយលានដុល្លារផងដែរ។

សូមជម្រាបដែរថា វិស័យទេសចរណ៍ គឺជាប្រភពចំណូលដ៏ធំសម្រាប់សេដ្ឋកិច្ចប្រទេសថៃ ហើយប៉ុន្មានខែចុងក្រោយនេះ វាជួបប្រទះនូវភាពរាំងស្ទះជាច្រើន ដែលធ្វើឲ្យស្ថានភាពសេដ្ឋកិច្ចនៃបងធំអាស៊ានទី២ ហាក់ស្ថិតក្នុងភាពស្រពិចស្រពិលក្នុងឆ្នាំនេះ៕

អត្ថបទ៖ Luffy រូបភាព៖ Reuters