សមាគមឧកញ៉ាកម្ពុជា បានដាស់តឿនក្រើនរំលឹកដល់សមាជិក សមាជិការបស់ខ្លួន និងបុគ្គលមានងារឧកញ៉ា ត្រូវប្រកាន់ខ្ជាប់នូវកិត្តិយស សីលធម៌ សុជីវធម៌ និងសេចក្ដីថ្លៃថ្នូររបស់គោរមងារឧកញ៉ា នឹងថាបើរកឃើញបានប្រព្រឹត្តសកម្មភាព និង/ឬប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់គុណតម្លៃ និងឧត្ដមភាពដ៏ឧត្ដុង្គឧត្ដម នៃគោរមងារឧកញ៉ា នឹងចាត់វិធានការតាមនីតិវិធីច្បាប់ជាក់ស្តែង។

ការចេញមកប្រកាសសារដាស់តឿនរបស់សមាគមឧកញ៉ាកម្ពុជា ទំនងកើតឡើងក្រោយមានឧត្តមសេនីយ៍ត្រីម្នាក់ឈ្មោះ ឈាវ មុន្និន ល្បីមានងារឧកញ៉ា ដែលបានប្រើប្រាស់បណ្តាញសង្គម TikTok ធ្វើឲ្យប៉ះពាល់កិត្តិយស សេចក្តីថ្លៃថ្នូររបស់ក្រសួងការពារជាតិ និងយោធាទាំងមូល នាពេលថ្មីៗនេះ។

តាមរយៈសេចក្តីប្រកាសព័ត៌មានរបស់ខ្លួន ក្នុងនាមជាស្ថាប័នតែមួយគត់ដែលតំណាងឱ្យគោរមវន្តទាំងអស់នៅកម្ពុជា សមាគមឧកញ៉ាកម្ពុជា អំពាវនាវដល់គោរមវន្តទាំងអស់ សូមប្រកាន់ខ្ជាប់នូវកិត្តិយស សីលធម៌ សុជីវធម៌ និងសេចក្ដីថ្លៃថ្នូរនៅក្នុងសង្គម ក្នុងការប្រកបមុខរបរនិងវិជ្ជាជីវៈឱ្យបានខ្ជាប់ខ្ជួន និងសូមមេត្តាយកចិត្តទុកដាក់ឱ្យបានខ្ពស់ជាទីបំផុត ចំពោះការប្រើប្រាស់បណ្តាញសង្គម ឬមធ្យោបាយផ្សព្វផ្សាយនានា ជៀសវាងការចែកចាយ ឬផ្សព្វផ្សាយនូវសកម្មភាព និង/ឬការប្រើពាក្យសម្ដីទាំងឡាយណា ដែលធ្វើឱ្យប៉ះពាល់ដល់គោរមងារជាកិត្តិយស ដែល អង្គព្រះមហាក្សត្រ បានប្រោសព្រះរាជទាន។

ជាមួយគ្នានេះដែរ សមាគមឧកញ៉ាកម្ពុជា នឹងចាត់វិធានការតាមនីតិវិធីច្បាប់ជាក់ស្តែង ចំពោះគោរមវន្តណា ដែលបានរកឃើញថាបានប្រព្រឹត្តសកម្មភាព និង/ឬប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់គុណតម្លៃ និងឧត្ដមភាពដ៏ឧត្ដុង្គឧត្ដម នៃគោរមងារឧកញ៉ា ស្របតាមព្រះរាជក្រឹត្យលេខ ស្តីពីគោរមងារឧកញ៉ា ក៏ដូចជាអនុក្រឹត្យស្តីពីបែបបទ និងនីតិវិធីនៃការស្នើសុំនិងវាយតម្លៃក្នុងការផ្តល់គោរមងារនិងការបញ្ចប់គោរមងារឧកញ៉ាផងដែរ៕

អត្ថបទ៖ សាងតេជៈ រូបភាព៖ ផេកសមាគមឧកញ៉ាកម្ពុជា