ប្រធានាធិបតីអាមេរិក Donald Trump បានប្រកាសថា ផែនការសងសឹកពន្ធរបស់លោក នឹងអនុវត្តចំពោះគ្រប់ប្រទេសទាំងអស់ទូទាំងសកលលោក មិនមែនធ្វើចំពោះតែក្រុមប្រទេសមួយចំនួន ដូចលើកមុននោះឡើយ។
Million Times 
ទីភ្នាក់ងារព័ត៌មាន Reuters បានរាយការណ៍ថា លោក Trump បានសន្យានឹងបញ្ចេញនូវផែនការទារពន្ធទ្រង់ទ្រាយធំ នៅថ្ងៃទី០២ ខែមេសា ដែលលោកកំណត់ថ្ងៃនេះជា «ទិវារំដោះជាតិ»។
មេដឹកនាំអាមេរិករូបនេះបានអះអាងថា ការទារពន្ធគយសងសឹក គឺជាយុទ្ធសាស្ត្រមួយសម្រាប់ការពារស្ថានភាពសេដ្ឋកិច្ចក្នុងស្រុក ពីការប្រកួតប្រជែងអយុត្តិធម៌លើឆាកអន្តរជាតិ ហើយវាក៏ជាកូនសោសំខាន់ ដើម្បីទទួលបានកិច្ចព្រមព្រៀងប្រសើរៗសម្រាប់អាមេរិក ជាមួយបណ្ដាប្រទេសផ្សេងទៀតផងដែរ។
គួរជម្រាបដែរថា កន្លងមកលោក Trump បានបង្ហើបពីផែនការទារពន្ធសងសឹក ដោយលោកបានបញ្ជាក់ថា អាមេរិកនឹងទារពន្ធក្នុងទំហំដូចគ្នា ចំពោះបណ្ដាប្រទេសណា ដែលបានដាក់ពន្ធលើការនាំចេញរបស់អាមេរិក៕
អត្ថបទ៖ Luffy រូបភាព៖ Bloomberg