រដ្ឋាភិបាលជប៉ុនបានបញ្ចេញរបាយការណ៍មួយ កាលពីថ្ងៃទី៣១ ខែមីនា ស្ដីពីហានិភ័យនៃការកើតមានគ្រោះរញ្ជួយដីកម្រិតធ្ងន់ ដែលអាចកើតមានចន្លោះពីកម្រិត ៨ ទៅ ៩វ៉ិចទ័រ។ នេះបើតាមការចុះផ្សាយពីសារព័ត៌មាន Reuters។
Million Times 
រដ្ឋាភិបាលជប៉ុនព្យាករថា គ្រោះរញ្ជួយដីនេះ ទំនងកើតមានឡើងនៅតំបន់ជាប់មាត់សមុទ្រ ប៉ុន្តែមិនបញ្ជាក់ពីកាលបរិច្ឆេទ ដែលវាអាចនឹងកើតឡើងឡើយ។ បើសិនជាមានគ្រោះរញ្ជួយដីកម្រិតធ្ងន់មែន ជប៉ុនទំនងខាតបង់សេដ្ឋកិច្ចរហូតដល់ ១,៨ទ្រីលានដុល្លារ ឬជិតពាក់កណ្ដាលនៃទំហំ GDP ក្នុងប្រទេស និងថែមទាំងអាចឆក់យកជីវិតមនុស្សប្រហែល ៣សែននាក់ថែមទៀត។
គួរជម្រាបដែរថា ជប៉ុនគឺជាប្រទេសមួយ ដែលងាយរងគ្រោះដោយសារការរញ្ជួយដីញឹកញាប់ជាងគេ ហើយរដ្ឋាភិបាលព្យាករថា នាពេលខាងមុខ នឹងមានហានិភ័យគ្រោះរញ្ជួយដីកម្រិត ៨វ៉ិចទ័រ ទៅ ៩វ៉ិចទ័រ រហូតដល់ ៨០% ឯណោះ។
ការព្យាករណ៍របស់រដ្ឋាភិបាលជប៉ុន ជុំវិញការរញ្ជួយដីកម្រិតធ្ងន់នេះ ត្រូវបានអះអាងថា តែងតែកើតឡើងរៀងរាល់ចន្លោះពី ១០០ ទៅ ១៥០ឆ្នាំម្ដង ខណៈកើតឡើងម្ដងៗ ជប៉ុនជួបនូវសោកនាដកម្មជាខ្លាំង ទាំងការបាត់បង់ប្រជាជន និងខូចខាតផ្នែកសេដ្ឋកិច្ច៕
អត្ថបទ៖ Luffy រូបភាព៖ Yahoo