សម្តេចតេជោ ហ៊ុន សែន លើបណ្តាញសង្គមបានបង្ហោះសារពីដំណឹងមរណភាពបងប្រុសបង្កើត គឺអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ភ្ជាប់រូបភាពច្រើនសន្លឹកជាមួយសារដ៏អាឡោះអាល័យសោកស្តាយជាពន់ពេក ដែលសម្តេចលើកឡើងថា បើទោះមិនចង់ទទួល ក៏ត្រូវតែទទួលយកការពិតនេះដែរ។

អ្នកឧកញ៉ា ហ៊ុន សាន ដែលជារៀមច្បងក្នុងចំណោមបងប្អូនបង្កើតសម្ដេចតេជោ ហ៊ុន សែន ប្រធានព្រឹទ្ធសភា ទទួលមរណភាពក្នុងជន្មាយុ ៧៨ឆ្នាំ ដោយរោគាពាធ នាវេលាម៉ោង ០២:២៧នាទីព្រឹកនៅថ្ងៃសុក្រ ទី២៨ ខែមីនា ឆ្នាំ២០២៥។

សម្តេចតេជោ ហ៊ុន សែន បានសរសេរសំណេររំលឹកកាលនៅស្រុកស្ទឹងត្រង់ និងស្រុកក្រូចឆ្មារ ខេត្តកំពង់ចាម យ៉ាងដូច្នេះថា បងប្រុសម្នាក់នេះ (ហ៊ុន សាន) បានលះបង់ច្រើនណាស់សម្រាប់ប្អូនៗ គឺសុខចិត្តបោះបង់ចោលការសិក្សានៅអនុវិទ្យាល័យនាសម័យនោះ មកជួយពុកម៉ែធ្វើស្រែចំការដើម្បីផ្តល់ឱកាសឲ្យប្អូនៗ ពិសេសសម្តេចទទួលបានការសិក្សានៅភ្នំពេញ។ សម្តេចរំលឹកបន្ថែមថា បំណងធំរបស់បងទី១ គឺធ្វើ ថីផែនទី ដែលពេលនេះហៅថា មន្ត្រីសុរិយោដី។

សូមជម្រាបថា អ្នកឧកញ៉ា ហ៊ុន សាន ជាកូនបង្កើតអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក។ អ្នកឧកញ៉ាមានបងប្អូនចំនួន ៦នាក់ក្នុងស្រី ៣នាក់រួមមាន៖ អ្នកឧកញ៉ា ហ៊ុន សាន, សម្តេច ហ៊ុន​ ណេង, សម្តេច ហ៊ុន សែន ​និង​ប្អូន​ស្រី​បី​នាក់​ទៀត អ្នកស្រី ហ៊ុន សេងនី អ្នកស្រីឧកញ៉ា ហ៊ុន ស៊ីណាត និង​អ្នកស្រី ហ៊ុន ប៊ុនធឿន។

អ្នកឧកញ៉ា ឧត្តមមេត្រីវិសិដ្ឋ ហ៊ុន សាន មានមុខតំណែងជារដ្ឋលេខាធិការក្រសួងសាធារណការ និងដឹកជញ្ជូន ហើយក៏ធ្លាប់កាន់តំណែងជាប្រធានសហគ្រាសសាធារណៈភ្នាក់ងារកម្ពុជានាវាចរណ៍ ដែលហៅកាត់ថា «កាំសាប» ផងដែរ៕

អត្ថបទ៖ សាងតេជៈ រូបភាព៖ ផេកសម្តេចតេជោ