អ្នកជំនួញចិនជាច្រើនបានផ្អាកការបញ្ជាទិញប្រេងពីប្រទេសវេណេស៊ុយអេឡាភ្លាមៗ បន្ទាប់ពីប្រធានាធិបតីអាមេរិក Donald Trump ប្រកាសពីទណ្ឌកម្មពន្ធគយ ចំពោះបុគ្គល ឬប្រទេសណា ដែលនាំចូលប្រេងពីទីក្រុង Caracas។ នេះបើតាមការចុះផ្សាយពីសារព័ត៌មាន Reuters។
Million Times 
ប្រធានាធិបតី Trump បានបញ្ជាថា អាមេរិកនឹងអនុវត្តការទារពន្ធបន្ថែម ២៥% សម្រាប់ទំនិញនាំចូលពីប្រទេសណា ដែលនាំចូលប្រេងពីវេណេស៊ុយអេឡា ចាប់ពីដើមខែមេសាតទៅ ដែលធ្វើឲ្យការលក់ប្រេងរបស់ប្រទេសមួយនេះ ជួបភាពជាប់គាំងមួយកន្លែងភ្លាមៗ។
បច្ចុប្បន្ន ពាណិជ្ជករចិនដែលរកស៊ីក្នុងវិស័យចម្រាញ់ប្រេង កំពុងរង់ចាំមើលការអន្តរាគមន៍ពីរដ្ឋាភិបាល ដ្បិតចិនគឺជាអ្នកនាំចូលប្រេងធំបំផុតរបស់វេណេស៊ុយអេឡា។
គួរជម្រាបដែរថា ប្រធានាធិបតី Donald Trump បានអះអាងថា ការដាក់ទណ្ឌកម្មបែបនេះលើប្រទេសវេណេស៊ុយអេឡា គឺជាការសងសឹកចំពោះការបញ្ជូនឧក្រិដ្ឋជន និងក្រុមជើងកាងមកកាន់សហរដ្ឋអាមេរិក៕
អត្ថបទ៖ Luffy រូបភាព៖ CNN