គណៈប្រតិភូអាមេរិកដឹកនាំដោយជំនួយការតំណាងពាណិជ្ជកម្មសហរដ្ឋអាមេរិក សម្រាប់អាស៊ីខាងត្បូង និងកណ្តាល លោក Brendan Lynch នឹងចាប់ផ្ដើមដំណើរទស្សនកិច្ច ទៅកាន់ប្រទេសឥណ្ឌាពីថ្ងៃទី២៥ ដល់ថ្ងៃទី២៩ ខែមីនា ដើម្បីជជែកពីកិច្ចការពន្ធគយ ជាមួយក្រុមមន្ត្រីឥណ្ឌា។ នេះបើតាមការចុះផ្សាយពីទីភ្នាក់ងារព័ត៌មាន Reuters។
Million Times 
អ្នកនាំពាក្យស្ថានទូតអាមេរិកបាននិយាយថា ដំណើរទស្សនកិច្ចមួយនេះ ឆ្លុះបញ្ចាំងពីការប្ដេជ្ញាចិត្តរបស់សហរដ្ឋអាមេរិក ក្នុងការជំរុញទំនាក់ទំនងពាណិជ្ជកម្មប្រកបដោយផលិតភាព និងមានតុល្យភាពជាមួយឥណ្ឌា។
រដ្ឋាភិបាលឥណ្ឌាបានបង្ហាញក្ដីសង្ឃឹមថា ពួកគេនឹងអាចជជែកជាមួយភាគីអាមេរិក ដើម្បីសុំការលើកលែង និងដកពួកគេចេញពីបញ្ជីឈ្មោះ ដែលប្រធានាធិបតី Donald Trump គ្រោងអនុវត្តវិធានការទារពន្ធសងសឹក លើបណ្ដាប្រទេសជាច្រើន ចាប់ពីដើមខែមេសាទៅ។
គួរជម្រាបដែរថា ប៉ុន្មានសប្ដាហ៍មកនេះ រដ្ឋាភិបាលឥណ្ឌាបានធ្វើការយ៉ាងយកចិត្តទុកដាក់ ជាមួយភាគីអាមេរិក ដើម្បីដោះស្រាយលើបញ្ហាពន្ធគយផ្សេងៗ ដូចជាដកចេញនូវការទារពន្ធចំពោះការនាំចូលរថយន្តពីអាមេរិក និងសន្យាបង្កើនការវិនិយោគនៅអាមេរិកជាដើម ដើម្បីយកចិត្តយកថ្លើមលោក Trump បញ្ជៀសការដាក់គំនាបពន្ធគយមកលើខ្លួន៕
អត្ថបទ៖ Luffy រូបភាព៖ ANI News