បណ្ឌិត សុខ ទូច ដែលប្រជាពលរដ្ឋភាគច្រើនបានស្គាល់តាមរយៈថ្វីមាត់វិភាគរឿងរ៉ាវសង្គម និងនយោបាយដ៏មានប្រជាប្រិយភាព បច្ចុប្បន្នលោកបណ្ឌិតកំពុងដឹកនាំស្ថាប័នរាជបណ្ឌិត្យសភាកម្ពុជា មានបេសកកម្មចម្បង ដើរតួក្នុងការសិក្សាស្រាវជ្រាវទាំងវិទ្យាសាស្ត្រសង្គម និងវិទ្យាសាស្ត្រពិត ដើម្បីរកធាតុចូលជូនរាជរដ្ឋាភិបាល។
លោក សុខ ទូច បានបញ្ចប់ថ្នាក់បណ្ឌិតផ្នែកប្រវត្ដិសាស្ដ្រ – នយោបាយ នៅសាកលវិទ្យាល័យ Voronezh State University ប្រទេសរុស្ស៊ី ឆ្នាំ១៩៩៩។ លោកបណ្ឌិតបានបោះពុម្ភស្នាដៃសៀវភៅជាច្រើនពាក់ព័ន្ធនឹងទ្រឹស្តីទំនាក់ទំនងអន្តរជាតិ និងវិទ្យាសាស្រ្តនយោបាយជាដើម។ ក្រៅពីភាសាជាតិលោកបណ្ឌិតអាចនិយាយភាសារុស្សុី និងអង់គ្លេសយ៉ាងស្ទាត់ជំនាញ។
ក្នុងនាមជាបញ្ញវ័នដែលមានបទពិសោធន៍ក្នុងស្ថាប័នរាជបណ្ឌិត្យសភាកម្ពុជាអស់ច្រើនឆ្នាំរាប់ចាប់ពីមន្ត្រីគ្រប់គ្រងរដ្ឋបាល រហូតក្លាយត្រូវបានប្រមុខរដ្ឋស្ដីទីសម្តេច សាយ ឈុំ ដំឡើងពីអនុប្រធាន ទៅជាប្រធានរាជបណ្ឌិតសភាកម្ពុជា ជំនួសលោកស្រីបណ្ឌិត ខ្លូត ធីតា ទៅតាមការស្នើសុំរបស់សម្តេច ហ៊ុន សែន នាយករដ្ឋមន្ត្រី នៅថ្ងៃទី២៩ ខែកក្កដា ឆ្នាំឆ្នាំ២០១៧ មានឋានៈស្មើ រដ្ឋមន្ត្រី។
Million Times 
នៅក្នុងពិធីប្រកាសឡើងកាន់តំណែងជាប្រធានរាជបណ្ឌិត្យសភានៅចំពោះមុខ សម្តេច ហ៊ុន សែន លោកបណ្ឌិត សុខ ទូច បានប្ដេជ្ញាថា លោកនឹងខិតខំដឹកនាំកិច្ចការងារក្នុងស្ថាប័នរាជបណ្ឌិត្យសភាកម្ពុជាឲ្យក្លាយទៅជាស្ថាប័ន «ធនាគារខួក្បាល» ដើម្បីអភិវឌ្ឍប្រទេសកម្ពុជា។ ក្រៅពីនេះលោកសុខ ទូច បានដាក់ចេញការងារជាអាទិភាពចំនួន៣ ក្នុងនោះរួមមានការ កិច្ចការងារកសិកម្ម និងបរិស្ថាន មីក្រូហិរញ្ញវត្ថុ និងជនបទ និងការងារព្រំដែន។
លោកបានសង្កត់ធ្ងន់ថា តំណែងជាប្រធានរាជបណ្ឌិត្យសភា មិនមែនជាគ្រឿងលម្អខ្លួននោះទេ ប៉ុន្តែវាគឺជាអម្រែក ដែលលោកត្រូវទទួលខុសត្រូវលើកិច្ចការធំៗ សម្រាប់ប្រទេសជាតិ។
ខាងក្រោមនេះជាបទពិសោធន៍ការងារលោកបណ្ឌិត សុខ ទូច នៅរាជបណ្ឌិត្យសភាកម្ពុជា៖
- ២០១៦ – បច្ចុប្បន្ន : សមាជិកពេញសិទ្ធិនៃរាជបណ្ឌិត្យសភាកម្ពុជា (មានគោរមងារ៖ បណ្ឌិតសភាចារ្យ)
- ២០១៦ – ២០១៧ : អនុប្រធានរាជបណ្ឌិត្យសភាកម្ពុជា (ឋានៈស្មើ រដ្ឋលេខាធិការ)
- ២០១៥ – ២០១៧ : ប្រធានវិទ្យាស្ថានទំនាក់ទំនងអន្ដរជាតិកម្ពុជា នៃរាជបណ្ឌិត្យសភាកម្ពុជា (ឋានៈស្មើ អគ្គនាយក)
- ២០១៣ – បច្ចុប្បន្ន : សមាជិកក្រុមប្រឹក្សាជាតិភាសាខ្មែរ នៃក្រុមប្រឹក្សាជាតិភាសាខ្មែរ
- ២០១២ – ២០១៣ : ទីប្រឹក្សាអមទីស្តីការគណៈរដ្ឋមន្ត្រី (រដ្ឋលេខាធិការ)នៃទីស្ដីការគណៈរដ្ឋមន្ដ្រី
- ២០១១ – ២០១៥ : ប្រធានគណៈកម្មការវិទ្យាសាស្ត្រ នយោបាយ នៃ ក្រុមប្រឹក្សាជាតិភាសាខ្មែរ
- ២០០៥ – ២០១៥ : អនុប្រធានវិទ្យាស្ថាន (អគ្គនាយករង) នៃវិទ្យាស្ថានទំនាក់ទំនងអន្ដរជាតិកម្ពុជា នៃរាជបណ្ឌិត្យសភាកម្ពុជា
- ២០០៣ – ២០០៥ : ប្រធានផ្នែកប្រវត្ដិសាស្ដ្រ និងវិទ្យាសាស្ដ្រនយោបាយ (ប្រធាននាយកដ្ឋាន) នៃវិទ្យាស្ថានមនុស្សសាស្ដ្រ និងវិទ្យាសាស្ដ្រសង្គម នៃរាជបណ្ឌិត្យសភាកម្ពុជា
- ២០០១ – ២០០៣ : មន្ត្រីគ្រប់គ្រងរដ្ឋបាល នៃវិទ្យាស្ថានមនុស្សសាស្ដ្រ និង វិទ្យា សាស្ដ្រ សង្គម នៃរាជបណ្ឌិត្យ សភា កម្ពុជា
ស្នាដៃបោះពុម្ពផ្សាយ
- ២០០២ : ចលនាភូមិមួយផលិតផលមួយ
- ២០០៣ : តួនាទីអង្គការសហប្រជាជាតិ
- ២០០៣ : ទ្រឹស្តីទំនាក់ទំនងអន្តរជាតិ
- ២០០៧ : ទំនាក់ទំនងរវាងកម្ពុជាជាមួយសហរដ្ឋអាមេរិក ចិន និងវៀតណាម២០០៧
- ២០០៨ : វេទិកាបណ្ឌិតសភាលើកទី៣ ស្ដីពី ខួបទី១៥ឆ្នាំ នៃកិច្ចព្រម ព្រៀង សន្ដិភាព ក្រុង ប៉ារីស ស្ដីពីដំណោះ ស្រាយ នយោបាយរួមនៅកម្ពុជា
- ២០០៨ : ទស្សនាវដ្ដីវិទ្យាសាស្ដ្ររបស់វិទ្យាស្ថានទំនាក់ទំនងអន្ដរជាតិកម្ពុជា លេខ១
- ២០០៩ : ទំនាក់ទំនងអន្តរជាតិ ៖ កម្ពុជាក្រោមក្រសែភ្នែកមហាអំណាច
- ២០០៩ : Cambodia After Paris Peace Agreement
- ២០០៩ : ទស្សនាវដ្ដីវិទ្យាសាស្ដ្ររបស់វិទ្យាស្ថានទំនាក់ទំនងអន្ដរជាតិកម្ពុជា លេខ២
- ២០១០ : ទស្សនាវដ្ដីវិទ្យាសាស្ដ្ររបស់វិទ្យាស្ថានទំនាក់ទំនងអន្ដរជាតិកម្ពុជា លេខ៣
- ២០១០ : ទំនាស់ព្រំដែនរវាងប្រទេសថៃ និងប្រទេសជិតខាង បោះពុម្ពផ្សាយ ដោយ វិទ្យាស្ថាន ទំនាក់ទំនងអន្តរជាតិនៃរាជបណ្ឌិត្យសភាកម្ពុជា
- ២០១១ : ទស្សនាវដ្ដីវិទ្យាសាស្ដ្ររបស់វិទ្យាស្ថានទំនាក់ទំនងអន្ដរជាតិកម្ពុជា លេខ៤
- ២០១៥ : នយោបាយការបរទេស ៖ ម្សិលមិញ ថ្ងៃនេះ និងថ្ងៃស្អែក
- ២០១៦ : អាស៊ាន-រុស្ស៊ី ក្នុងបរិបទពិភពលោកថ្មី
- ២០១៧ : ជម្លោះព្រំដែនកម្ពុជា-ឡាវ៖ ពីតំបន់អូរអាឡៃដល់ចំណុចប្រសព្វនៃខេត្តអាតាពើ
អត្ថបទ៖ សាងតេជៈ រូបភាព៖ ផេកសម្តេចតេជោ