ដំណឹងដ៏តក់ស្លុតកក្រើកវិស័យសិល្បៈទូទាំងពិភពលោកនាដើមឆ្នាំនេះ គឺការបាត់បង់តារាសម្ដែងស្រីដ៏មានប្រជាប្រិយភាព Barbie Hsu ដែលអ្នកគាំទ្រខ្មែរស្គាល់ជា សាន់ឆាយ ក្នុងរឿង «F4» តៃវ៉ាន់ ល្បីខ្លាំងកាលពីជាង ២០ ឆ្នាំមុន។
Million Times 
សាន់ឆាយ តារាសម្ដែងតៃវ៉ាន់ បានទទួលមរណភាពក្នុងវ័យ ៤៨ឆ្នាំ ក្រោយកើតមានជំងឺរលាកសួត ដែលកើតចេញពីជំងឺផ្ដាសាយ អំឡុងពេលទៅដើរលេងជួបជុំគ្រួសារនៅឯប្រទេសជប៉ុន នាឱកាសពិធីបុណ្យចូលឆ្នាំថ្មីប្រពៃណីចិន។
ទាក់ទងព័ត៌មានចចាមអារ៉ាមនៃការស្លាប់របស់ សាន់ឆាយ បានកើតឡើងតាំងពីថ្ងៃ២ ខែកុម្ភៈ លើបណ្ដាញសង្គម។ ទើបតែថ្ងៃនេះប្អូនស្រី Barbie Hsu បានសម្រេចចេញមកបញ្ជាក់ជាផ្លូវការនៅព្រឹកថ្ងៃ៣ ខែកុម្ភៈ ឆ្នាំ ២០២៥ តាមរយៈសេចក្ដីថ្លែងការណ៍មួយក្នុងកម្មវិធីសារព័ត៌មានរបស់ TVBS។
មួយរយៈចុងក្រោយនៃជីវិត Barbie មិនសូវសមប្រកបប៉ុន្មានឡើយ ដោយសារតែបញ្ហាលែងលះជាមួយអតីតស្វាមី ព្រមទាំងរឿងរ៉ាវស្វាមីបច្ចុប្បន្នតែងតែត្រូវបានគេរិះគន់ និងលេចឡើងក្ដីក្ដាំឥតឈប់ឈរថែមទៀត។
រឿង «F4 ឬ JVKV» ដែលផលិតកាលពីឆ្នាំ ២០០១ ជាស្នាដៃដ៏ល្បីល្បាញបំផុតរបស់ Barbie Hsu ហើយកេរ្តិ័ឈ្មោះនាង នៅតែល្បីល្បាញមកទល់ពេលនេះ៕
អត្ថបទ៖ មេរ៉ា, រូបភាព៖ Vnexpress