ចរន្តនៃការគាំទ្របានលេចឡើងនៅលើបណ្តាញសង្គមសម្រាប់ក្មេងជនជាតិថៃម្នាក់ត្រូវបានធ្វើរោគវិនិច្ឆ័យថា មានកង្វះ Aromatic L-amino acid decarboxylase (AADC Deficiency) ដែលជាជំងឺហ្សែនដ៏កម្រប៉ះពាល់ដល់មនុស្សប្រហែល ១៣០នាក់ប៉ុណ្ណោះនៅទូទាំងពិភពលោក។

Bangkook Post ចុះផ្សាយថា កុមារអាយុ១ឆ្នាំ ដែលគេស្គាល់ថាជា Akin កំពុងទទួលការព្យាបាលនៅមន្ទីរពេទ្យ King Chulalongkorn Memorial ក្នុងទីក្រុងបាងកក ជាកន្លែងដែលគ្រួសារត្រូវប្រឈមមុខនឹងការចំណាយដ៏គួរឱ្យភ្ញាក់ផ្អើលរហូតដល់ ៣លានអឺរ៉ូ ប្រមាណ ១០៥លានបាត សម្រាប់ការព្យាបាល។

ស្ថានភាពនេះរារាំងសមត្ថភាពរាងកាយក្នុងការផលិតសារធាតុបញ្ជូនសរសៃប្រសាទសំខាន់ៗដូចជា អេពីណេហ្វីន ដូប៉ាមីន និងសេរ៉ូតូនីន ដែលកំណត់យ៉ាងសំខាន់ដល់ជីវិតប្រចាំថ្ងៃរបស់កុមារ។

ដោយសារភាពចាំបាច់នៃការផ្តល់ហិរញ្ញវត្ថុដោយខ្លួនឯង មន្ទីរពេទ្យ King Chulalongkorn បានចរចាជាមួយក្រុមហ៊ុនឱសថដើម្បីកាត់បន្ថយការចំណាយពី ៣.៦ លានអឺរ៉ូទៅ ៣លានអឺរ៉ូ។ ឪពុករបស់ Akin ដែលជាឱសថការី កំពុងប្រើប្រាស់វិធីគ្រប់យ៉ាងដើម្បីទទួលបានមូលនិធិ។

កាលពីថ្ងៃទី៤ ខែមករា ឪពុក Akin បានបង្ហោះនៅលើទំព័រហ្វេសប៊ុករៃអង្គាសប្រាក់ថាកូនរបស់គាត់បច្ចុប្បន្នមានអាយុ ១៥ខែ។ គាត់បាននិយាយថា ការព្យាបាលគួរតែចាប់ផ្តើមពី ១៨ ទៅ ៣០ខែ ដើម្បីសម្រេចបានលទ្ធផលល្អបំផុត។

នៅក្នុងការបង្ហាញនៃសាមគ្គីភាព អ្នកប្រើប្រាស់បណ្តាញសង្គមបាននឹងកំពុងចែករំលែកយុទ្ធនាការ GoFundMe ដែលផ្តួចផ្តើមដោយសមាគមកាកបាទក្រហមថៃ និងមូលនិធិ Teach Rare ដែលជាក្រុមបង្កើតឡើងដោយ Richard E Poulin III និង Judy Wei បន្ទាប់ពីការធ្វើរោគវិនិច្ឆ័យកង្វះ AADC ។
អ្នករួមចំណែកត្រូវបានលើកទឹកចិត្តឱ្យចូលទៅកាន់គេហទំព័រ www.gofundme.com ដើម្បីគាំទ្រ Akin និងគ្រួសាររបស់គាត់នៅពេលពួកគេត្រូវការ៕

អត្ថបទ៖ សារ៉ាយ រូបភាព៖