រដ្ឋមន្ត្រីការបរទេសម៉ាឡេស៊ី លោក Mohamad Hasan ត្រូវទទួលរងការផាកពិន័យ បន្ទាប់ពីលោកបានជក់បារីមួយដើម នៅទីកន្លែងហាមឃាត់។ នេះបើតាមការចុះផ្សាយពីសារព័ត៌មាន VNExpress។

រដ្ឋមន្ត្រីក្រសួងសុខាភិបាល Dzulkefly Ahmad បានបង្ហោះរូបភាពលោក Hasan ពេលរដ្ឋមន្ត្រីរូបនេះ កំពុងឈរជក់បារីនៅក្នុងហាងលក់អាហារតាមចិញ្ចើមផ្លូវ ក្នុងរដ្ឋ Negeri Sembilan នៃប្រទេសម៉ាឡេស៊ី។

តាមច្បាប់ដែលបានចែងក្នុងរដ្ឋធម្មនុញ្ញរបស់ម៉ាឡេស៊ី រាល់ការជក់បារីតាមហាងលក់អាហារ និងភោជនីយដ្ឋានទាំងអស់ ត្រូវរាប់បញ្ចូលជាអំពើខុសច្បាប់។ បុគ្គលដែលល្មើសច្បាប់នេះ នឹងរងការផាកពិន័យ រហូតដល់ ៥ ០០០រីងហ្គីត ឬប្រហែល ១ ១២០ដុល្លារ។

ជុំវិញបញ្ហាមួយនេះ លោក Hasan ក៏បានចេញមុខសុំទោសជាសាធារណៈកាលពីថ្ងៃពុធ និងបាននិយាយថា លោកទទួលបានការព្រមានពីអាជ្ញាធរសុខាភិបាល ក៏ប៉ុន្តែមិនបានបង្ហើបពីទំហំទឹកប្រាក់ ដែលត្រូវពិន័យនោះឡើយ៕

អត្ថបទ៖ Luffy រូបភាព៖ India Today