ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុងថ្មី លោកស្រី អែម សុធារ៉ា ត្រូវបានចូលរួមប្រកាសតែងតាំងដោយផ្ទាល់ពីលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
Million Times 
កាលពីព្រឹកថ្ងៃ ១០ ខែធ្នូ ឆ្នាំ ២០២៤ កន្លង ទៅរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានអញ្ជើញចូលរួមផ្ទាល់ក្នុងពិធីប្រកាសចូលកាន់មុខតំណែងលោកស្រី អែម សុធារ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុង នៅក្នុងសាលមហោស្រពខេត្តកោះកុង។
លោក ឌិត ទីណា សម្ដែងក្ដីសោមនស្សរីករាយ និងអបអរសាទរដល់លោកស្រីប្រធានមន្ទីរថ្មី ដែលកាន់តំណែងជាប្រធានមន្ទីរកសិកម្ម រុក្ខាប្រមាញ់ និងនេសាទ ព្រោះជាប្រវត្តិសាស្ត្រកម្ពុជាហើយ ដែលមានស្ត្រីកាន់មុខតំណែងនេះ។
រដ្ឋមន្ត្រីរូបនោះ ក៏បានលើកឡើងពីគោលនយោបាយរបស់រាជរដ្ឋាភិបាលអាណត្តិទី៧ ដឹកនាំដោយសម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការរក្សាស្ថេរភាពថ្លៃកសិផល សម្រាប់ប្រជាកសិករ និងអ្នកប្រើប្រាស់។ ដោយពិនិត្យច្បាស់លាស់ពីតម្រូវការ និងការផ្គត់ផ្គង់ ការដាក់ពង្រាយមន្ត្រីកសិកម្មឃុំ ដែលជាជំនួយការតាមដានបច្ចេកទេសរបស់កសិករ ហើយរាយការណ៍បញ្ហាប្រឈមទាន់ពេលវេលា រួមទាំងការកសាងសហគមន៍កសិកម្មទំនើប ដែលមានភាពទំនើបកម្មការងារ អាចជួយកសិករកាត់បន្ថយថ្លៃដើមផលិត ក្នុងនោះរួមមានផែនការផលិតកម្មច្បាស់លាស់ ទទួលបានកម្ចីដើមទុនការប្រាក់ទាប អាចផ្គត់ផ្គង់ទៅតាមតម្រូវការទីផ្សារ ដោយមានការគាំទ្របច្ចេកទេសពីក្រសួងកសិកម្ម វិនិយោគទទួលបានប្រាក់ចំនេញ និងមានហានិភ័យទាបនៃការប្រែប្រួលអាកាសធាតុ៕
អត្ថបទ៖ មេរ៉ា, រូបភាព៖ ក្រសួងកសិកម្ម រុក្ខាប្រមាញ់ និងនេសាទ