មេដឹកនាំចិន Xi Jinping បានសន្យាថានឹងធ្វើការជាមួយប្រធានាធិបតី Donald Trump ដែលចូលកាន់តំណែងផ្លូវការនាខែមករាខាងមុខ។ ការសន្យារបស់មេដឹកនាំចិនធ្វើឡើងនៅចំពោះមុខមេដឹកនាំអាមេរិកបច្ចុប្បន្នលោក Joe Biden ក្នុងកិច្ចប្រជុំកាលពីថ្ងៃសៅរ៍។
សារព័ត៌មានរដ្ឋចិនបានចុះផ្សាយថា ទីក្រុងប៉េកាំងនិយាយថា ប្រធានាធិបតី Xi បានគូសបញ្ជាក់ថា «សង្រ្គាមត្រជាក់ថ្មីមិនគួរត្រូវបានប្រយុទ្ធ និងមិនអាចឈ្នះបានទេ»។ លោកបន្តថា ទំនាក់ទំនងស្ថិរភាពរវាងចិន និងសហរដ្ឋអាមេរិកគឺសំខាន់សម្រាប់ភាគីទាំងពីរ និងពិភពលោក។
Million Times 
មេដឹកនាំអ្នកទាំងពីរបានជួបគ្នាកាលពីថ្ងៃសៅរ៍នៅខាងក្រៅកិច្ចប្រជុំកំពូលប្រចាំឆ្នាំនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (Apec) នៅប្រទេសប៉េរូ ជាកន្លែងដែលមេដឹកនាំទាំងពីរទទួលស្គាល់នូវការឡើងចុះទំនាក់ទំនងក្នុងរយៈពេល ៤ឆ្នាំរបស់លោក Biden ក្នុងតំណែង។
នៅក្នុងជំនួបកាលពីថ្ងៃសៅរ៍ ក្នុងទីក្រុង Lima មេដឹកនាំចិនបាននិយាយថា ប្រសិនបើសហរដ្ឋអាមេរិក និងចិន ចាត់ទុកគ្នាទៅវិញទៅមកជាគូប្រជែង ឬជាសត្រូវដ៏ខ្លាំងក្លា និងការបង្កគ្រោះថ្នាក់ដល់គ្នាទៅវិញទៅមក ទំនាក់ទំនងចិន-អាមេរិកនឹងទទួលរងនូវការធ្លាក់ចុះ។
លោកបន្ថែមថា គោលដៅរបស់ទីក្រុងប៉េកាំងនៃទំនាក់ទំនងស្ថិរភាពជាមួយទីក្រុងវ៉ាស៊ីនតោននឹងនៅតែមិនផ្លាស់ប្តូរ ហើយថាលោកនឹងធ្វើការជាមួយរដ្ឋបាលថ្មីរបស់សហរដ្ឋអាមេរិកដើម្បីរក្សាទំនាក់ទំនង ពង្រីកកិច្ចសហប្រតិបត្តិការ និងគ្រប់គ្រងការខ្វែងគំនិតគ្នា។
ទន្ទឹមនឹងនេះលោក Joe Biden បាននិយាយថា ការប្រកួតប្រជែងជាយុទ្ធសាស្ត្ររវាងមហាអំណាចពិភពលោកទាំងពីរ មិនគួរកើនឡើងទៅជាសង្រ្គាមនោះទេ។ លោកនិយាយថា «ប្រទេសរបស់យើងទាំងពីរមិនអាចអនុញ្ញាតឱ្យការប្រកួតប្រជែងណាមួយក្លាយជាជម្លោះនោះទេ។ នោះគឺជាការទទួលខុសត្រូវរបស់យើង ហើយក្នុងរយៈពេល ៤ឆ្នាំចុងក្រោយនេះ ខ្ញុំគិតថាយើងបានបង្ហាញឱ្យឃើញពីលទ្ធភាពនៃទំនាក់ទំនងនេះ»។
ក្រុមអ្នកវិភាគបាននិយាយថា ទំនាក់ទំនងរវាងសហរដ្ឋអាមេរិក និងចិនអាចកាន់តែមានភាពប្រែប្រួលនៅពេលដែលលោក Trump ត្រលប់មកកាន់តំណែងវិញក្នុងរយៈពេលពីរខែ ដែលជំរុញដោយកត្តារួមទាំងការសន្យាដំឡើងពន្ធលើការនាំចូលរបស់ចិន។
សូមជម្រាបថា ប្រធានាធិបតីជាប់ឆ្នោតថ្មីអាមេរិកបានសន្យាយកពន្ធ ៦០% លើការនាំចូលទាំងអស់ពីប្រទេសចិន។ ជាមួយគ្នានេះក្នុងអំឡុងអាណត្តិដំបូងរបស់លោក Trump បានដាក់គោលដៅក្រុងប៉េកាំងថាជា «គូប្រជែងយុទ្ធសាស្ត្រ»»៕
អត្ថបទ៖ សារ៉ាយ រូបភាព៖ AP