ទោះបីជាមានឈ្មោះជាមេដឹកនាំមហាអំណាចសេដ្ឋកិច្ចធំបំផុតលើពិភពលោក តែប្រធានាធិបតីអាមេរិកនៅតែជាបុគ្គលិកសហព័ន្ធ ទទួលបានប្រាក់ខែពីរដ្ឋ ដូចបុគ្គលិកដទៃទៀតដែរ។

តាមការចុះផ្សាយពីសារព័ត៌មាន Firstpost បានបង្ហាញថា ប្រាក់ខែរបស់ប្រធានាធិបតីអាមេរិក គឺមានចំនួនច្រើនជាងបុគ្គលិកដទៃជិត ១០ដង ពោលក្នុងមួយឆ្នាំមេដឹកនាំអាមេរិក ទទួលបានប្រាក់ខែ ៤០០ ០០០ដុល្លារឯណោះ។

ក្រៅពីប្រាក់ខែគោល តើប្រធានាធិបតីអាមេរិកទទួលបានអត្ថប្រយោជន៍អ្វីទៀត?

ប្រធានាធិបតីអាមេរិក គឺជាមុខតំណែងខ្ពស់បំផុតនៅក្នុងជួររដ្ឋាភិបាល នៃមហាអំណាចធំបំផុតលើលោក និងមានប្រាក់ខែច្រើនបំផុត ក៏ដូចជាអត្ថប្រយោជន៍ច្រើនហូរហែផងដែរ។

ក្រៅពីប្រាក់ខែគោល ៤០០ ០០០ដុល្លារក្នុងមួយឆ្នាំ ប្រធានាធិបតីអាមេរិក ក៏ទទួលបាននូវប្រាក់ឧបត្ថម្ភបន្ថែម ៥០ ០០០ដុល្លារ កញ្ចប់ធ្វើដំណើរទេសចរណ៍មិនចាំបាច់បង់ពន្ធ ១០០ ០០០ដុល្លារ និងកញ្ចប់ចំណាយសម្រាប់ការកម្សាន្តលំហែអារម្មណ៍ ១៩ ០០០ដុល្លារក្នុងមួយឆ្នាំថែមទៀត។

បន្ថែមពីនោះ សារព័ត៌មាន Business Insider ក៏ធ្លាប់រាយការណ៍ដែរថា ប្រធានាធិបតីអាមេរិក នឹងទទួលបាននូវទឹកប្រាក់ ១០០ ០០០ដុល្លារ ដើម្បីតុបតែងសេតវិមានឡើងវិញ នៅពេលពួកគេជាប់ឆ្នោតផងដែរ។

តើប្រធានាធិបតីអាមេរិក អាចប្រកែកមិនយកប្រាក់ខែបានដែរឬទេ?

តាមច្បាប់ដែលបានចែង ប្រធានាធិបតីអាមេរិកមិនអាចប្រកែក មិនទទួលប្រាក់ខែរបស់ពួកគេបានឡើយ ជាក់ស្ដែងអតីតប្រធានាធិបតីអាមេរិក George Washington ធ្លាប់បដិសេធប្រាក់ខែរបស់លោក ប៉ុន្តែសភាមិនអនុញ្ញាត។

ទោះមិនអាចបដិសេធមិនទទួលប្រាក់ខែមែន តែប្រធានាធិបតីអាមេរិកមានសិទ្ធបរិច្ចាគប្រាក់ខែរបស់ពួកគេ ទៅកាន់អង្គការសប្បុរសធម៌ផ្សេងៗតាមចិត្ត។

តួយ៉ាង អតីតប្រធានាធិបតីអាមេរិកដូចជា លោក Herbert Hoover លោក John F Kennedy និងលោក ដូណាល់ ត្រាំ ជាដើម សុទ្ធតែបានបរិច្ចាគប្រាក់ខែរបស់ខ្លួនសឹងតែទាំងស្រុង ទៅកាន់អង្គការសប្បុរសធម៌ ដោយព្រមទទួលប្រាក់ខែតែ ១ដុល្លារប៉ុណ្ណោះ៕

អត្ថបទ៖ Luffy រូបភាព៖ CNN