បេក្ខភាពប្រធានាធិបតី ដូណាល់ ត្រាំ បានរិះគន់ឥតសំចៃមាត់ ទៅលើអតីតប្រធានាធិបតីអាមេរិក បារ៉ាក់ អូបាម៉ា ជុំវិញការចេញមុខ ស្វែងរកសន្លឹកឆ្នោតជូនអ្នកស្រីកាម៉ាឡា ហារីស កាលពីពេលកន្លងទៅ។
លោកត្រាំ បានស្រែកប្រាប់ទៅកាន់អ្នកគាំទ្រនៅរដ្ឋ North Carolina ថា លោកអូបាម៉ា គឺជាមនុស្សគួរឲ្យស្អប់ខ្ពើមបំផុត ចំពោះទង្វើដែលលោកបានធ្វើរយៈពេលប៉ុន្មានសប្ដាហ៍នេះ ដោយសារតែការនិយាយស្ដីរបស់លោក អូបាម៉ា គឺប្រៀបដូចជាជំរុញឲ្យមានការរើសអើង។ នេះបើតាមការចុះផ្សាយពីសារព័ត៌មាន The Hill។
លោកត្រាំ បាននិយាយថា៖ រយៈពេលប៉ុន្មានថ្ងៃនេះ ខ្ញុំបានមើលគាត់ (អូបាម៉ា) ចេញស្វែងរកសន្លឹកឆ្នោតជូនហារីស ហើយគាត់កំពុងជំរុញឲ្យមានការរើសអើង និងបែងចែកបក្សពួក។
លោកដូណាល់ ត្រាំ និងលោកបារ៉ាក់ អូបាម៉ា គឺជាគូសត្រូវលើឆាកនយោបាយអាមេរិកយូរយារណាស់ហើយ។ ធ្លាប់មានម្ដងនោះ លោកត្រាំ ចោទប្រកាន់អតីតប្រធានាធិបតីរូបនេះថា មិនមែនកើតនៅអាមេរិកទេ ហេតុអីបានជាមានសិទ្ធឈរឈ្មោះបោះឆ្នោត ក្លាយជាប្រធានាធិបតី ដែលបង្កឲ្យមានការជជែកវែកញែកពាសពេញបណ្ដាញសង្គម។
គួររំលឹកដែរថា ប៉ុន្មានសប្ដាហ៍ចុងក្រោយនេះ អតីតប្រធានាធិបតី បារ៉ាក់ អូបាម៉ា បានបង្ហាញវត្តមាននៅរដ្ឋ Nevada, Pennsylvania និង Arizona ដើម្បីស្វែងរកការគាំទ្រ ជូនលោកស្រី កាម៉ាឡា ហារីស និងបានហៅលោកត្រាំថា ជាជនអាត្មានិយមគិតតែប្រយោជន៍ផ្ទាល់ខ្លួន មិនសក្ដិសមដឹកនាំមហាអំណាចសេដ្ឋកិច្ចធំបំផុតលើលោកឡើយ៕
អត្ថបទ៖ Luffy រូបភាព៖ Sky News