ប្រធានក្រុមប្រឹក្សាភិបាល និងអគ្គនាយប្រតិបត្តិ ក្រុមហ៊ន រ៉ូយ៉ាល់ គ្រុបដែលនរណាៗក៏ស្គាល់យ៉ាងច្បាស់គឺជាមហាសេដ្ឋី គិត ម៉េង នោះ តែងតែចែករំលែកចំណេះដឹងផ្នែកមុខជំនួញ និងការត្រៀមខ្លួន ដើម្បីប្រឡូកក្នុងការងារជាធុរកិច្ចជន ដល់មនុស្សជំនាន់ក្រោយៗ។
Million Times 
ជានិច្ចកាលមិនថាសំណេរ ឬក៏វីដេអូដែលលើកឡើងលើបណ្ដាញសង្គមផ្ទាល់ខ្លួនរបស់មហាសេដ្ឋី គិត ម៉េង ឡើយ បានផ្ដល់ប្រយោជន៍ធំធេង ដល់អ្នកចាប់ផ្ដើមបើកអាជីវកម្មខ្លួនឯង។ សម្រាប់ពេលចាប់ផ្ដើមធុរកិច្ចដំបូងក្នុងឋានៈជាសហគ្រិនវ័យក្មេងមួយរូបប្រធានក្រុមប្រឹក្សាភិបាល និងអគ្គនាយប្រតិបត្តិ ក្រុមហ៊ន រ៉ូយ៉ាល់ គ្រុប បានផ្ដោតសំខាន់លើមាន «ភាពសាមញ្ញ» ធ្វើឲ្យជំនួញរស់រាន ទទួលជោគជ័យ និងកសាងទ្រព្យសម្បត្តិ។
សម្រង់សម្ដីដ៏មានន័យរបស់មហាសេដ្ឋី គិត ម៉េង “ភាពជោគជ័យពិតប្រាកដមិនមែនគ្រាន់តែធ្វើឲ្យទ្រព្យ ឬអំណាចរបស់ខ្លួនកើនទ្បើងនោះទេ។ ភាពជោគជ័យពិតប្រាកដគឺការរួមចំណែកធ្វើឲ្យមានផលវិជ្ជមានដើម្បីបុព្វហេតុណាមួយដែលធំជាងប្រយោជន៍ផ្ទាល់ខ្លួនរបស់អ្នក”។
មហាសេដ្ឋីជួរមុខនៃកម្ពុជារូបនេះ បានទទួលស្គាល់ថា “ខ្ញុំធ្លាប់គិតថាភាពជោគជ័យត្រូវបានវាស់វែងដោយទំហំទឹកប្រាក់ដែលខ្ញុំមានក្នុងគណនីធនាគាររបស់ខ្ញុំ។ ប៉ុន្តែក្រោយពេលមានភាពចាស់ទុំ ចាស់ចិត្តចាស់គំនិត ខ្ញុំបានយល់ដឹងថា រង្វាស់ពិតប្រាកដនៃភាពជោគជ័យ គឺការធ្វើឲ្យមានផល ឬឥទ្ធិពលវិជ្ជមានរបស់អ្នក លើអ្នកដទៃ“។
កំពូលអ្នកជំនួញវាល់លានបានបញ្ជាក់ថា ពេលវេលាមានមោទនភាពបំផុតនោះ គឺពេលដែលអាចធ្វើឲ្យមានការផ្លាស់ប្តូរវិជ្ជមានដើម្បីអ្នកដទៃ មិនថាជាការជួយសហគ្រិនវ័យក្មេងម្នាក់ឲ្យសម្រេចគោលដៅរបស់ខ្លួន, មិនថាជាការចូលរួមចំណែកយ៉ាងសំខាន់នៅក្នុងការជួយដល់សង្គមជាតិ ឬការផ្ដល់ការងារដែលធ្វើឲ្យមានស្ថិរភាព និងធ្វើឲ្យប្រជាពលរដ្ឋខ្មែរចៀសផុតពីភាពក្រីក្រនោះទេ។
ប្រធានក្រុមប្រឹក្សាភិបាល និងអគ្គនាយប្រតិបត្តិ ក្រុមហ៊ន រ៉ូយ៉ាល់ គ្រុប បានបន្ថែមទៀតថា នៅពេលអ្នកចូលរួមចំណែកដើម្បីបុព្វហេតុណាមួយដែលធំជាងប្រយោជន៍ផ្ទាល់ខ្លួន អ្នកបង្កើតឥទ្ធិពលវិជ្ជមានលើមនុស្សតៗគ្នា។ សកម្មភាពរបស់អ្នកជំរុញចិត្តអ្នកដទៃឲ្យធ្វើដូចអ្នក។ បុគ្គលិក ដៃគូ និងសូម្បីតែដៃគូប្រកួតប្រជែងនឹងចាប់អារម្មណ៍លើសកម្មភាពនេះ ហើយនឹងធ្វើតាមរបៀបដឹកនាំរបស់អ្នក។ យូរៗទៅ កិច្ចខិតខំប្រឹងប្រែងរួមគ្នានេះអាចផ្លាស់ប្តូរមុខជំនួញ សហគមន៍ និងពិភពលោកបាន៕
អត្ថបទ៖ មេរ៉ា, រូបភាព៖ Royal Group