ព្រឹត្តិការណ៍ BVLGARI AETERNA បានរំលងផុតទៅ១ខែហើយក៏ដោយ តែនៅដក់ជាប់ក្នុងការចង់ចាំរបស់ប្រជាពលរដ្ឋខ្មែរដដែល ព្រោះជាមុខមាត់ និងកិត្តិនាមដ៏អស្ចារ្យនៃប្រទេស ដែលអាចទទួលបានការចាប់អារម្មណ៍ពីកំពូលប្រេនគ្រឿងអលង្ការលំដាប់ពិភពលោកមួយនោះ។ BVLGARI ជាយីហោឈានមុខគេនៅលើពិភពលោក ហើយមានប្រជាប្រិយភាពទាក់ទាញអភិជនៗជុំវិញពិភពលោកឲ្យជាវរបស់របរខ្លួនដែរ។
Million Times 
ក្នុងចំណោមភ្ញៀវ VIP នៃកម្មវិធីចូលរួម Gala Dinner របស់ BVLGARI គ្រួសារសេដ្ឋីលំដាប់កំពូលនៃស្រុកខ្មែរ គឺប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប គិត ម៉េង និងភរិយាក៏ត្រូវបានអញ្ជើញផងដែរ។
ក្នុងឱកាសចូលរួមកម្មវិធីបង្ហាញ collection ថ្មីនោះ សេដ្ឋីនី ម៉ៅ ចំណាន បានលើកឡើងថា “ពេលបានចូលរួមក្នុងព្រឹត្តិការណ៍ BVLGARI AETERNA នៅប្រាសាទបាយ័នខ្មែរយើង គឺជាឱកាសដ៏អស្ចារ្យមួយដែលឆ្លុះបញ្ចាំងអំពីមោទនភាពដែលដក់ជាប់ក្នុងបេះដូងនាងខ្ញុំយ៉ាងជ្រាលជ្រៅ។ ខណៈពេលនាងខ្ញុំបានឈរស្ថិតនៅក្នុងចំណោមសិល្បករល្បីៗ បុគ្គលមានចក្ខុវិស័យច្នៃប្រឌិតខ្ពស់ និងបណ្ដាថ្នាក់ដឹកនាំមកពីជុំវិញពិភពលោក ធ្វើឱ្យអារម្មណ៍នាងខ្ញុំកាន់តែរំភើបហួសនឹងពណ៌នា ហើយនោះគឺជារាត្រីដែលមានន័យបំផុតចំពោះកម្ពុជាយើង។ កេរដំណែល សិល្បៈវប្បធម៌ និងប្រវត្តិសាស្ត្រយើង ត្រូវបានវេញបញ្ចូលគ្នាទៅជាការសាទរមួយដែលជួយលើកកម្ពស់កិត្យានុភាពខ្មែរយើងឲ្យកាន់តែល្បីរន្ទឺលើឆាកអន្តរជាតិថែមមួយកម្រិតទៀត“។
សេដ្ឋីនីដែលមានទាំងសម្រស់ និងចំណេះដឹងបានលើកឡើងបន្តទៀតថា ព្រឹត្តិការណ៍នោះមិនគ្រាន់តែជារាត្រីដ៏ប្រណីតនោះទេ ពោលគឺជារាត្រីដែលបានបង្ហាញពីសម្រស់ដ៏ស្រស់ត្រកាលនៃខឿនវប្បធម៌ និងដួងព្រលឹងជាតិខ្មែរជាអមតៈ។
ប្រធានសមាគមសិល្បករខ្មែរបានបន្ថែមជាចុងក្រោយថា ការមើលឃើញទឹកដីប្រវត្តិសាស្ត្រ និងប្រជាជនខ្មែរត្រូវបានទទួលស្គាល់ និងសាទរបែបនេះ ជាក្ដីសង្ឃឹមខ្ពស់ចំពោះភាពវិជ្ជមាន ដែលនឹងកើតមានឡើងជាបន្តបន្ទាប់ទៀតនាព្រឹត្តិការណ៍ធំៗដូចនោះនាពេលក្រោយៗ។
សេដ្ឋីនី ម៉ៅ ចំណាន បានបង្ហាញខ្លួនតាំងពីពេលបង្ហាញឈុតគ្រឿងអលង្ការ Bvlgari នៅសណ្ឋាគារ Sofitel ដែលមានតម្លៃសរុប ១៥០ លានដុល្លារ ចំនួន ២១៤ គ្រឿង៕
អត្ថបទ៖ មេរ៉ា, រូបភាព៖ Royal Group