ទិដ្ឋាការមាស “Gold Card” ឬសញ្ជាតិអាមេរិក ដែលមានតម្លៃប្រហែល ៥លានដុល្លារក្នុងមួយសន្លឹក និងជាប្រធានបទដ៏ក្ដៅគគុក សម្រាប់ការជជែកវែកញែកលើបណ្ដាញសង្គម បច្ចុប្បន្នកំពុងលក់ចេញជាច្រើនសន្លឹក។
Million Times 
រដ្ឋមន្ត្រីក្រសួងពាណិជ្ជកម្ម លោក Howard Lutnick បាននិយាយនៅក្នុងផតខាស All-In ថា ទិដ្ឋាការមាសដែលប្រធានាធិបតី Donald Trump បានប្រកាសលក់នាពេលកន្លង ឥឡូវនេះបានលក់ចេញជាច្រើនសន្លឹក ដោយក្នុងមួយថ្ងៃអាចលក់រហូតដល់ ១ ០០០សន្លឹកឯណោះ សរុបជាទឹកប្រាក់ប្រហែល ៥ពាន់លានដុល្លារក្នុងមួយថ្ងៃ។
លោក Lutnick បាននិយាយថា មានមនុស្សប្រហែល ៣៧លាននាក់លើពិភពលោក ដែលមានលទ្ធភាពទិញទិដ្ឋាការ Gold Card ដើម្បីទទួលបានសញ្ជាតិអាមេរិក ហើយប្រធានាធិបតី Trump មានបំណងលក់ប័ណ្ណមាសនេះត្រឹម ១លានសន្លឹកប៉ុណ្ណោះ។
រដ្ឋមន្ត្រីក្រសួងពាណិជ្ជកម្មរូបនេះអះអាងថា ទិដ្ឋាការមាស ត្រូវបានបង្កើតឡើងដើម្បីជំនួសឲ្យទិដ្ឋាការ EB-5 ដែលតម្រូវឲ្យវិនិយោគិន បណ្ដាក់ទុន ១លានដុល្លារ ដើម្បីទទួលបានទិដ្ឋាការ។ ទិដ្ឋាការមាសមានតម្លៃថ្លៃជាង រហូតដល់ ៥លានដុល្លារ ប៉ុន្តែអត្ថប្រយោជន៍ក៏មានច្រើនហូរហៀរផងដែរ ដូចជា ទទួលបានសិទ្ធរស់នៅអាមេរិកភ្លាមៗ ដោយគ្មានការកំណត់ពេលវេលា និងអាចទទួលបានសញ្ជាតិអាមេរិក ដោយរង់ចាំរយៈពេលខ្លីប៉ុណ្ណោះ។
អ្វីដែលកាន់តែពិសេសដែលទិដ្ឋាការមាស Gold Card មាន ប៉ុន្តែ EB-5 មិនមាន គឺតម្រូវការក្នុងការស្នើសុំទិដ្ឋាការ។ វីសាប្រភេទ EB-5 តម្រូវឲ្យមានការបណ្ដាក់ទុនយ៉ាងតិច ១លានដុល្លារ និងការផ្ដល់ការងារយ៉ាងតិចជូនជនជាតិអាមេរិក ១០នាក់ ប៉ុន្តែចំពោះ Gold Card វិញ មិនមានការទាមទារអ្វីទាំងអស់ ពោលគ្រាន់តែបង់លុយ ៥លានដុល្លារទៅរដ្ឋាភិបាល នឹងទទួលបានសិទ្ធរស់នៅភ្លាមតែម្ដង៕
អត្ថបទ៖ Luffy រូបភាព៖ Merca20