អ្នកជំនួញក្នុងវិស័យដឹកជញ្ជូន និងបដិសណ្ឋារកិច្ចដ៏ល្បីឈ្មោះ អ្នកឧកញ៉ា សួរ វីរៈ បានកត់សម្គាល់ថា គ្រប់ភាពជោគជ័យទាំងអស់សុទ្ធតែមានការប្រថុយប្រថាន ហើយអាជីវកម្មរីកចម្រើនក៏សុទ្ធតែមានកំហុសបន្សល់ទុកដែរ។ ដូច្នេះត្រូវតែគិតឲ្យឆាប់ ធ្វើសកម្មភាពឲ្យលឿន។

អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈប៊ុនថាំ អេចប្រេស ដែលធ្លាប់ហែឆ្លងកាត់ឧបសគ្គនានាក្នុងវិស័យដឹកជញ្ជូនស្ថិតនៅខេត្តកោះកុងរហូតមានឱកាសក្តោបក្តាប់បានទីផ្សារទូទាំងប្រទេសកម្ពុជា និងតភ្ជាប់ជាមួយប្រទេសជិតខាងផងដែរនោះ បានលើកឡើងថា «គ្មានភាពជោគជ័យណាដែលមិនមានការប្រថុយនោះទេ ហើយក៏គ្មានការរីកចម្រើនអាជីវកម្មយ៉ាងឆាប់រហ័សដែលមិនមានកំហុសបន្សល់ទុកនោះដែរ។ តែគ្រប់បញ្ហាតែងតែមានដំណោះស្រាយ សំខាន់អ្នកអាចមានឱកាសក្តោបអាជីវកម្មក្នុងដៃជាមុនសិន»។

លើបណ្តាញសង្គមហ្វេសប៊ុកផ្ទាល់ខ្លួន អ្នកឧកញ៉ាបានសង្កត់ធ្ងន់ថា៖ «គិតកាន់តែយួរ អ្នកនឹងស្ទាក់ស្ទើរក្នុងការសំរេចចិត្ត…! ចឹងត្រូវតែគិតឲ្យឆាប់ ធ្វើសកម្មភាពឲ្យលឿន… តែកុំគិតខ្លី»។

អ្នកឧកញ៉ា សួរ វីរៈ មានស្រុកកំណើតពីខេត្តកំពង់ធំហើយបានធំធាត់ឡើងនៅភ្នំពេញ ក្រោយមកបន្តជីវិតជាយុវវ័យនៅខេត្តកោះកុង ប្រកបអាជីពជាអ្នកនាំភ្ញៀវទេសចរបរទេស ដើរលេងកម្សាន្តនៅរមណីដ្ឋាននានាក្នុខេត្តជាប់សមុទ្រមួយនេះ។ រហូតមកពេលនេះ លោកបានពង្រីកការដឹកជញ្ជូនអ្នកដំណើរនៅទូទាំង ២៥រាជធានី-ខេត្ត ដោយមានរថយន្តទំនើបៗជាង ១០០ គ្រឿង និងរថយន្តដឹកទំនិញរាប់រាយគ្រឿងឯណោះ។ លើសពីនេះ លោកក៏មានរីសត់ជាច្រើនកន្លែងផងដែរ សុទ្ធតែល្បីៗលំដាប់ៗឈានមុខគេនៅកម្ពុជា៕

អត្ថបទ៖ ពិសិដ្ឋ រូបភាព៖ ផេកអ្នកឧកញ៉ា សួរ វីរៈ