រដ្ឋបាលរាជធានីភ្នំពេញ បានប្រកាសថា នឹងបើកដំណើរការសាកល្បងផ្លូវថ្មើរជើង (Walk street) តាមបណ្ដោយមាត់ទន្លេ ចាប់ពីមុខប្រៃសណីយ៍កម្ពុជា រហូតដល់មុខព្រះបរមរាជវាំង នៅថ្ងៃ១ ខែកុម្ភៈ ឆ្នាំ ២០២៥ ខាងមុខនេះ។
Million Times 
ផ្លូវថ្មើរជើង (Walk street) តាមបណ្ដោយមាត់ទន្លេចាប់ពីមុខប្រៃសណីយ៍កម្ពុជា រហូតដល់មុខព្រះបរមរាជវាំង (ផ្លូវលេខ២៤០) នឹងដំណើរការសាកល្បងនាដើមខែកុម្ភៈ ដោយដំណើរការមួយសប្ដាហ៍ ២ថ្ងៃ គឺមានថ្ងៃសៅរ៍ និងថ្ងៃអាទិត្យ ចាប់ពីម៉ោង១៨:០០ ដល់ម៉ោង ២៣:០០។
កិច្ចប្រជុំទាក់ទងនឹងគម្រោងនោះដឹកនាំដោយ លោក ឃួង ស្រេង អភិបាលរាជធានីភ្នំពេញ និងមានការចូលរួមពីតំណាងក្រសួងទេសចរណ៍ និងអាជ្ញាធរពាក់ព័ន្ធនៅសាលារាជធានីភ្នំពេញ កាលពីរសៀលថ្ងៃទី២៩ ខែមករា ដើម្បីពិនិត្យវឌ្ឍនភាពនៃការរៀបចំផ្លូវថ្មើរជើង (Walkstreet)។
លោក ឃួង ស្រេង បានឲ្យដឹងថា ផ្លូវថ្មើរជើងនោះ មានគម្រោងជាយូរមកហើយ តាំងពី ឆ្នាំ ២០១៩ មកម្ល៉េះ តែដោយសារវិបត្តិជំងឺកូវីដ-១៩ ធ្វើឲ្យគម្រោងផ្អាកដំណើរការសិន។ បន្ទាប់ពីមានការ ណែនាំរបស់រាជរដ្ឋាភិបាល រដ្ឋបាលរាជធានីភ្នំពេញ បានជំរុញ ការងារឲ្យផ្លូវថ្មើរជើងនេះ ដំណើរការឡើងវិញ ដើម្បីទាក់ទាញភ្ញៀវទេសចរជាតិ និងអន្តរជាតិមកលេងកម្សាន្តឲ្យបានច្រើន។
គម្រោងផ្លូវថ្មើរជើង (Walk street) ដំណើរការ នឹងត្រូវបិទចរាចរណ៍យានជំនិះគ្រប់ប្រភេទ រៀបចំបង្គន់អនាម័យ និងការងាររៀបចំសណ្ដាប់ធ្នាប់ការលក់ដូរនៅលើតម្រាយផ្លូវនោះឲ្យបានល្អ។ មុនថ្ងៃបើក នាថ្ងៃ១ ខែកុម្ភៈ រដ្ឋបាលរាជធានីភ្នំពេញ ត្រូវធ្វើជូនដំណឹង ដើម្បីណែនាំប្រជាពលរដ្ឋរស់នៅតំបន់នោះ ឲ្យបានយល់ពីគម្រោងផ្លូវថ្មើរជើង។
អាជ្ញាធរត្រូវរៀបចំសណ្តាប់ធ្នាប់ឲ្យបានល្អ ដោយមានការផ្សព្វផ្សាយឲ្យបានទូលំទូលាយ កុំឲ្យយានយន្តចូល ពេលបើកដំណើរការ នៅថ្ងៃសៅរ៍ និងថ្ងៃអាទិត្យ៕
អត្ថបទ៖ មេរ៉ា, រូបភាព៖ រដ្ឋបាលរាជធានីភ្នំពេញ