អ្នកជំនួញផ្នែកអចលនទ្រព្យកំពុងទទួលបានការចាប់អារម្មណ៍ពីវិនិយោគិនបរទេស អ្នកឧកញ៉ា គឹម សុខអេង ថ្មីៗនេះបានត្រឡប់ទៅសាកលវិទ្យាល័យដែលលោកធ្លាប់បានសិក្សា រៀនសូត្រ និងទទួលបានការបណ្ដុះបណ្ដាលពីសាស្ត្រាចារ្យគ្រប់ផ្នែក។
Million Times 
អ្នកឧកញ៉ា គឹម សុខអេង ត្រូវបានថ្នាក់ដឹកនាំសាកលវិទ្យាល័យន័រតុន អញ្ជើញចូលរួមក្នុងកម្មវិធីជួបជុំសាស្ត្រាចារ្យផ្នែកស្ថាបត្យកម្ម និងនគរោបនីយវិទ្យា និងផ្នែកសំណង់ស៊ីវិល កាលពីថ្ងៃទី ២៥ ខែធ្នូកន្លងទៅថ្មីៗនេះ។
បើទោះជាចាកចេញពីសាកលវិទ្យាល័យហើយយូរក៏ដោយ តែអ្នកជំនួញអចលនទ្រព្យអ្នកឧកញ៉ា គឹម សុខអេង នៅតែមានមនោសញ្ចេតនា នឹករលឹកនិងមានមោទនភាពក្នុងនាមអតីតនិស្សិតនៅទីនោះ។ ម្ចាស់បុរី KC ព្រែកព្នៅ និង KK The Residence ក៏បានថ្លែងអំណរគុណចំពោះសាស្ត្រាចារ្យគ្រប់ជំនាញដែលបានបង្ហាត់បង្ហាញណែនាំផ្លូវដល់រូបលោកផងដែរ។
អាកប្បកិរិយាអ្នកឧកញ៉ា គឹម សុខអេង ចំពោះសាស្រ្តាចារ្យមិនប្រែឡើយ នៅតែឱនលំទោន សុភាពរាបសារជានិច្ច ទឹកមុខញញឹម និងដឹងគុណដល់អ្នកដែលផ្ដល់ចំណេះដឹង និងអប់រំលោក។
អ្នកឧកញ៉ា បានចាត់ទុក សាស្រ្តាចារ្យ និងសាកលវិទ្យាល័យ ជាអ្នកបានចូលរួមចំណែកយ៉ាងសំខាន់ក្នុងការបង្កើតមូលធនមនុស្សនៅកម្ពុជា ហើយធនធានដែលបានឆ្លងកាត់នៅសាកលវិទ្យាល័យន័រតុន បាននិងកំពុងចូលរួមចំណែកជាមួយរាជរដ្ឋាភិបាលលើការបម្រើជាតិ និងប្រជាជន ក៏ដូចជាការចូលរួមអភិវឌ្ឍសេដ្ឋកិច្ចជាតិ។
អ្នកតាមដានវិស័យអចលនទ្រព្យ ប្រហែលជាដឹងត្រឹមថា អ្នកឧកញ៉ា គឹម សុខអេង គឺជាម្ចាស់បុរី KC ព្រែកព្នៅ និង KK The Residence ប៉ុណ្ណោះ។ ប៉ុន្តែប្រវត្តិសិក្សា និងការតស៊ូកន្លងមកនៃអ្នកឧកញ៉ា គឹម សុខអេង ពិតជាមិនសូវមានអ្នកដឹងច្រើនប៉ុន្មានឡើយ។
អ្នកឧកញ៉ារូបសង្ហា គឹម សុខអេង ជាអតីតនិស្សិតសាកលវិទ្យាល័យន័រតុនជំនាញស្ថាបត្យកម្ម ហើយលោកបានចាប់ផ្ដើមធ្វើការងារតាំងពីនៅជានិស្សិតឆ្នាំទី២ ម្ល៉េះ។ រៀនចប់ថ្នាក់បរិញ្ញាបត្រភ្លាម ប្រធាន JCI Mekong រូបនេះ ក៏បានចាប់ផ្ដើមអាជីពជាអ្នកផ្នែកគូរប្លង់ហើយក្រោយៗមកទៀតក៏បានបើកក្រុមហ៊ុនក្នុងវិស័យអចលនទ្រព្យ វិនិយោគអចលនទ្រព្យ និងអភិវឌ្ឍន៍បុរីដោយខ្លួនឯងវិញម្តង។
កេរ្តិ៍ឈ្មោះនៃអ្នកជំនួញ គឹម សុខអេង កាន់តែល្បីល្បាញទៅៗពីមួយថ្ងៃទៅមួយថ្ងៃតាមរយៈជំនាញស្ថាបត្យកម្ម និងជំនួញអចលនទ្រព្យរបស់លោកដែលបានខិតខំកសាងឡើងមក៕
អត្ថបទ៖ មេរ៉ា, រូបភាព៖ Kim Sok Eng