មាន ២ គ្រួសារអភិជនដ៏ល្បី បានមកភ្ជាប់សាច់ភ្ជាប់ឈាមជាមួយគ្នា នោះគឺកូនប្រុសថៅកែហាងលក់សម្លៀកបំពាក់ លីម ហុង ចំណែកកូនស្រី គឺជាកូនរបស់សេដ្ឋី អ៊ឹង ប៊ុនហ៊ូវ ប្រធានអគ្គនាយកក្រុមហ៊ុន ING Holdings Co., Ltd.។
Million Times 
ក្នុងពិធីចូលចែចូវនៃកូនប្រុសឧកញ៉ា ចាប មួយហុង និងលោកស្រី លឹម សុខចេង ដែលមានកូនកំលោះឈ្មោះ លីម ហ្វីលីប ជាគូកូនក្រមុំឈ្មោះ អ៊ឹង ស៊ីវឈីនស៊ី កូនស្រីបណ្ដូលចិត្តសេដ្ឋី អ៊ឹង ប៊ុនហ៊ូវ ហើយកម្មវិធីរៀបចំឡើងនៅគេហដ្ឋានដ៏ធំស្កឹមស្កៃនៃខាងស្រីតែម្ដង។ គ្រប់ប្លង់រូបថត បានបង្ហាញឲ្យឃើញយ៉ាងច្បាស់ពីភាពប្រណីត សព្វជ្រុងរបស់ភូមិគ្រឹះលំដាប់សេដ្ឋីជួរមុខស្រុកខ្មែរ។
កូនកំលោះរបស់ឧកញ៉ា ចាប មួយហុង គឺជានិស្សិតបញ្ចប់ការសិក្សាពីអង់គ្លេស រូបសម្បត្តិស្រស់សង្ហា ចំណេះដឹងជ្រៅជ្រះសមគ្នាជាមួយកូនស្រីម្ចាស់ក្រុមហ៊ុនអភិវឌ្ឍន៍ អចលនទ្រព្យដ៏ធំមួយនៅកម្ពុជា។ ចំណែកគ្រួសារខាងកូនកំលោះ ក៏រកស៊ីផ្នែកអចលនទ្រព្យ និងមានហាងលក់សម្លៀកបំពាក់ លីម ហុង ល្បីរាប់ឆ្នាំមកហើយ ព្រមទាំងពង្រីកបានច្រើនសាខា។
ភូមិគ្រឹះទាំងមូលរៀបចំទទួលកម្មវិធីចូលចែចូវ បានយ៉ាងស្រស់ស្អាត អមដោយផ្កាស្រស់រាប់សែនទង ហើយកូនកំលោះ និងកូនក្រមុំក៏បានគ្រងឈុតប្រពៃណីខ្មែរយ៉ាងសមសួន និងប្រកបដោយភាពថ្លៃថ្នូរ។
ងាកទៅមើលភ្ញៀវ និងសាច់ញាតិម្ចាស់កម្មវិធី ក៏បានរៀបចំខ្លួនក្នុងឈុតប្រពៃណីអាវប៉ាក់ សំពត់ហូលស្រស់ស្អាតទាំងព្រម អមជាមួយគ្រឿងអលង្ការភ្លឺចែងចាំងសឹងគ្រប់គ្នា។ ជុំវិញបរិវេណភូមិគ្រឹះដ៏ធំ ឃើញសុទ្ធតែជាឡានទំនើបចត៕
អត្ថបទ៖មេរ៉ា, រូបភាព៖The Ring Wedding Cambodia