មន្ត្រីនៃធនាគារកណ្តាលថៃ បាននិយាយថា កំណើនសេដ្ឋកិច្ចរបស់ប្រទេសថៃនឹងរងផលប៉ះពាល់ដោយសារសម្ពាធនៃការដំឡើងពន្ធរបស់សហរដ្ឋអាមេរិកលើការនាំចេញរបស់ខ្លួន បើទោះបីជាមិនខ្លាំងដូចអំឡុងពេលជំងឺរាតត្បាត Covid-19 ក៏ដោយ ។
ការដាក់ពន្ធគយរបស់សហរដ្ឋអាមេរិក និងការពន្យារពេលវិនិយោគ នឹងជះឥទ្ធិពលលើការនាំចេញរបស់ប្រទេសថៃនៅក្នុងឆមាសទីពីរនៃឆ្នាំនេះ។ នេះបើតាមជំនួយការទេសាភិបាលធនាគារកណ្តាលថៃ លោក Sakkapop Panyanukul បានប្រាប់សន្និសីទសារព័ត៌មាន។
លោក Sakkapop Panyanukul បាននិយាយថា “ភាពមិនប្រាកដប្រជានៃគោលនយោបាយពាណិជ្ជកម្មសកលគឺជាក្តីព្រួយបារម្មដ៏ធំ និងអូសបន្លាយដែលនឹងប៉ះពាល់ដល់ប្រទេសថៃតាមវិធីជាច្រើន”។
ប្រទេសថៃស្ថិតក្នុងចំណោមប្រទេសអាស៊ីអាគ្នេយ៍ដែលរងសម្ពាធពន្ធគយរបស់ប្រធានាធិបតីអាមេរិក Donald Trump ដោយប្រឈមនឹងពន្ធ ៣៦% ប្រសិនបើការចរចាមិនបានសម្រេច ហើយនឹងផុតកំណត់នៅក្នុងខែកក្កដា។
លោក Sakkapop បាននិយាយថា សេដ្ឋកិច្ចឥឡូវនេះទំនងជានឹងកើនឡើងតិចជាង ២.៥% នៅឆ្នាំនេះ ទាបជាងការព្យាករណ៍ពីមុន ដោយសារការនាំចូលរបស់សហរដ្ឋអាមេរិកខ្ពស់ ដើម្បីកាត់បន្ថយអតិរេកពាណិជ្ជកម្មរបស់ថៃជាមួយអាមេរិកនឹងប៉ះពាល់ដល់ផលិតកម្មក្នុងស្រុក។
លោកបានថ្លែងថា ផលិតផលក្នុងស្រុកសរុបនឹងធ្លាក់ចុះយ៉ាងពិតប្រាកដ ប៉ុន្តែលោកថា ចំនួនប៉ុន្មាននៅតែមិនច្បាស់លាស់ និងថា ផលប៉ះពាល់នឹងមិនតូចទេ ប៉ុន្តែវានឹងមិនធ្ងន់ធ្ងរដូចក្នុងអំឡុងពេល Covid នោះទេ។
លោកបានបន្តថា អតិផរណាទំនងជានឹងធ្លាក់ចុះដែលជំរុញដោយកត្តាផ្នែកផ្គត់ផ្គង់ ប៉ុន្តែមិនមានសម្ពាធលើគោលនយោបាយរូបិយវត្ថុទេ៕
អត្ថបទ៖ សារ៉ាយ រូបភាព៖ Bangkok Post