ថ្លែងចេញពីខេត្តព្រះសីហនុ សម្តេច ហ៊ុន ម៉ាណែត នាយករដ្ឋមន្ត្រី បានលើកឡើងថា មានកោះមួយចំនួនត្រូវបានដកហូត ពីវិស័យឯកជនមកវិញ បន្ទាប់ពីស្នើសុំអាជ្ញាបណ្ណហើយទុកចោល មិនមានសកម្មភាពអភិវឌ្ឍន៍ នឹងថាបានណែនាំឱ្យក្រុមប្រឹក្សាអភិវឌ្ឍកម្ពុជា CDC ធ្វើការវាយតម្លៃឡើងវិញ ដើម្បីបែងចែកកំណត់ឱ្យបានច្បាស់លាស់ សម្រាប់កោះណាទុកឱ្យវិស័យឯកជនធ្វើការអភិវឌ្ឍន៍ ហើយកោះណាទុកសម្រាប់ធ្វើជាទីតាំងសាធារណៈសម្រាប់វិស័យការពារជាតិ។
ក្នុងពិធីសម្ពោធដាក់ឱ្យដំណើរការជាផ្លូវការនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម នៅព្រឹកថ្ងៃទី៥ ខែមេសានេះ មានប្រសាសន៍ថា ឥឡូវនេះដល់ពេលដែលក្រុមប្រឹក្សាអភិវឌ្ឍកម្ពុជា ចាប់ផ្តើមវាយតម្លៃឡើងវិញទៅលើកោះខ្លះ ដែលសុំអាជ្ញាបណ្ណហើយទុកចោល ដោយកន្លងទៅមានធ្វើការវាយតម្លៃ និងដកយកមកវិញ ប៉ុន្តែដកហើយប្រាកដជាមានអ្នកផ្សេងសុំហើយ។ ក្នុងន័យនេះ សម្តេចបានណែនាំគិតឱ្យហើយទៅកន្លែងណាដែលដកហើយទុកសម្រាប់កងទ័ពជើងទឹក សម្រាប់មូលដ្ឋានការពាររយៈពេលវែង។ បន្ទាប់មកក៏ត្រូវគិតគូរទុកកន្លែងផ្សេងៗទៀត ដើម្បីឱ្យវិស័យឯកជនធ្វើការ វិនិយោគ ឫសម្រាប់ប្រជាពលរដ្ឋរស់នៅផងដែរ ដែលនេះគឺជាការគិតគូររយៈពេលវែងរបស់រាជរដ្ឋាភិបាល។
Million Times 
សម្តេចបានថ្លែងពន្យល់ថា ការគិតគួរបែងចែងដូចនេះ ព្រោះយើងមិនអាចគិតគូរតែពីកងទ័ព អត់គិតពីកំណើននៃតម្រូវការសេដ្ឋកិច្ច ពាណិជ្ជកម្មរបស់ប្រជាពលរដ្ឋនោះទេ ដូចនេះការកំណត់ទីតាំង ការកំណត់ការប្រើប្រាស់ដី គឺជាកិច្ចការចាំបាច់ដែលយើងត្រូវគិតគូរទុកជាមុន។
សម្តេច ហ៊ុន ម៉ាណែត បានសង្កត់ធ្ងន់ដោយណែនាំឱ្យក្រុមប្រឹក្សាអភិវឌ្ឍកម្ពុជា គិតគូរធ្វើការងារជាមួយក្រសួងការពារជាតិ កំណត់ទុកឱ្យហើយសម្រាប់កន្លែងណាដែលជាទីតាំងសម្រាប់វិស័យការពារជាតិ គឺរក្សាទុកធ្វើជាទីតាំងសាធារណៈសម្រាប់វិស័យការពារជាតិ ហើយត្រូវមានការគ្រប់គ្រងឱ្យបានជាប់។
សូមជម្រាបថា ប្រទេសកម្ពុជាមានឆ្នេរសមុទ្រប្រវែង ៤៤០គ.ម ស្តិតនៅជាប់ខេត្តទាំង ៤ ក្នុងនោះខេត្តកោះកុងមានឆ្នេរវែងជាងគេប្រវែង ២៣៧ គ.ម ខេត្តកំពតមានប្រវែង ៦៧គ.ម ខេត្តព្រះសីហនុមានប្រវែង ១១០គ.ម និងខេត្តកែបមានប្រវែង ២៦គ.ម។ បើនិយាយពីកោះនៅដែនសមុទ្រវិញ ខេត្តទាំង ៤ ក៏មានកោះជាច្រើនលាតសន្ធឹងក្នុងដែនសមុទ្រ ហើយកោះខ្លះត្រូវបានអភិវឌ្ឍទៅជាកូនទីក្រុង ទីប្រជុំជន និងតំបនកម្សាន្តសម្រាប់ភ្ញៀវទេសចរណ៍ ខណៈខេត្តកោះកុងមាន ២៣កោះ ព្រះសីហនុ ៣២កោះ កំពត ៣កោះ និងកែប ១៣កោះ៕
អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី