នៅថ្ងៃទី៣ ខែមេសា រដ្ឋបាលអាមេរិករបស់លោក Donald Trump បានប្រកាសដំឡើងពន្ធលើទំនិញនាំចូលពីប្រទេសកម្ពុជាដល់ទៅ ៤៩% ដើម្បីឆ្លើយតបទៅនឹងពន្ធទំនិញដែលកម្ពុជានាំចូលពីអាមេរិកចំនួន ៩៧%។ ការដំឡើងពន្ធរបស់អាមេរិកពេលនេះ កម្ពុជាជាប្រទេសដែលរងការដំឡើងពន្ធខ្ពស់ពីសហរដ្ឋអាមេរិកច្រើនជាងគេបំផុតនៅក្នុងតំបន់អាស៊ាន។
តាមរយៈលិខិតរបស់សម្តេច ហ៊ុន ម៉ាណែត នាយករដ្ឋមន្រី នៅថ្ងៃទី៤នេះបានផ្ញេីជូនទៅកាន់លោក Donald Trump ដើម្បីស្នេីចរចារលេីការអនុវត្តពន្ធនាំចូលរបស់កម្ពុជាទៅកាន់សហរដ្ឋអាមេរិក ដោយកម្ពុជាប្តេជ្ញាចិត្តខ្ពស់ ក្នុងការជំរុញការនាំចូលទំនិញពីសហរដ្ឋអាមេរិក ជាមួយនឹងការបន្ថយភ្លាមៗនូវអត្រាពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%។
ក្នុងលិខិតនោះ សម្តេច ហ៊ុន ម៉ាណែត បានបញ្ជាក់ថា កន្លងទៅកម្ពុជាយកពន្ធនាំចូលលេីផលិតផលពីអាមេរិកមិនលេីសពី ៣៥%។ ក្នុងន័យនេះ កម្ពុជា បានស្នើសុំឱ្យមានការចរចាជាមួយរដ្ឋបាលរបស់អាម៉េរិក និងស្នើសុំឱ្យ ពិចារណាពន្យារពេលការអនុវត្តពន្ធដូចបានរៀបរាប់នេះ។
ព្រមជាមួយគ្នានេះ ដេីម្បីចូលរួមក្នុងការបង្ហាញពីទឹកចិត្ត និង ស្មារតីនៃការពង្រឹងកិច្ចសហការពាណិជ្ជប្រទេសទាំងពីរ កម្ពុជាប្តេជ្ញាចិត្ត ក្នុងការចូលរួមលេីកកម្ពស់ផលិតផលអាម៉េរិក ដោយនឹងទម្លាក់តម្លៃពន្ធលេី ១៩ប្រភេទផលិតផលពី ៣៥% មកត្រឹម ៥%។
សហរដ្ឋអាមេរិកគឺជាទីផ្សារធំបំផុតមួយសម្រាប់ការនាំចេញទំនិញរបស់កម្ពុជា។ ចាប់ពីឆ្នាំ២០២០ដល់ឆ្នាំ ២០២៤ កម្ពុជាសម្រេចពាណិជ្ជកម្មជាមួយអាមេរិកសរុបប្រមាណ ៤២ ០១១ លានដុល្លារ ក្នុងនោះកម្ពុជានាំចេញទៅកាន់ទីផ្សារអាមេរិកប្រមាណ ៤០ ៥៨៧ លានដុល្លារ ខណៈនាំចូលមកវិញប្រមាណ ១ ៤២១លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា៕
អត្ថបទ៖ សាងតេជៈ រូបភាព៖ បណ្តាញសង្គម