ក្រុមហ៊ុន Smart Eden បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជាតាំងពីឆ្នាំ២០២៤ ដែលទទួលបានការគាំទ្រច្រើនពីអតិថិជនក្នុងប្រទេសបារាំង ហើយក្នុងឆ្នាំ២០២៥នេះ ក្រុមហ៊ុនមានបំណងពង្រីកការនាំចេញផលិតផលកម្ពុជា ពី ១០ ទៅ ១៥មុខទៅកាន់ទីផ្សារបារាំង។ 

បើយោងតាមខ្លឹមសារនៃជំនួបរវាងលោក Laurent Strauch នាយកប្រតិបត្តិក្រុមហ៊ុន Smart Eden ជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១ ខែមេសា ឆ្នាំ២០២៥។ លោក Strauch លើកឡើងថា Smart Eden គឺជាក្រុមហ៊ុនដែលចែកចាយផលិតផលដ៏ធំ បច្ចុប្បន្នមានបណ្តាញលក់ជាង ៦.០០០ ទីតាំងនៅទូទាំងប្រទេសបារាំង។

លោកថ្លែងបញ្ជាក់ថា៖ «យើងមានបំណងពង្រីកការនាំចេញផលិតផលកម្ពុជា ពី ១០ ទៅ ១៥មុខ ក្នុងឆ្នាំ២០២៥នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ។ យើងក៏គ្រោងផលិតបឺរពីគ្រាប់ស្វាយចន្ទី ដើម្បីនាំចេញទៅបារាំងផងដែរ»។ បន្ថែមពីលើនេះ Smart Eden បានវាយតម្លៃខ្ពស់ក្នុងការយកកម្ពុជាធ្វើជាទីតាំងយុទ្ធសាស្ត្រសម្រាប់តំបន់ ដើម្បីចែកចាយផលិតផលបារាំងដែលមានគុណភាព។

ឆ្លើយតបទៅនឹងបំណងរបស់ក្រុមហ៊ុនបារាំង Smart Eden លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រាជរដ្ឋាភិបាលកម្ពុជាផ្តល់អាទិភាពខ្ពស់ដល់ការអភិវឌ្ឍវិស័យស្វាយចន្ទី ជាទំនិញយុទ្ធសាស្ត្រ។ យើងចង់ប្រែក្លាយកម្ពុជាទៅជាប្រទេសផ្គត់ផ្គង់ផលិតផលស្វាយចន្ទីធំបំផុតមួយសម្រាប់ពិភពលោក។

លោកបានបញ្ជាក់ថា ក្រសួងឧស្សាហកម្មគាំទ្រក្រុមហ៊ុន Smart Eden ក្នុងការផលិតបឺរពីគ្រាប់ស្វាយចន្ទី ហើយយើងលើកទឹកចិត្តក្រុមហ៊ុនឱ្យសិក្សាផលិតផលសក្តានុពលផ្សេងៗទៀតរបស់កម្ពុជា ដោយសហការជាមួយក្រុមការងារ របស់ក្រសួង និងដៃគូ ដូចជាសហគ្រិនខ្មែរជាដើម៕

អត្ថបទ៖ ពិសិដ្ឋ រូបភាព៖ ក្រសួងឧស្សាហកម្ម