រយៈពេល ៣ខែឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា CDC បានអនុម័តគម្រោងវិនិយោគចំនួន ១៧២គម្រោង ក្នុងនោះក្រុមហ៊ុនរបស់ចិន បានឈរនៅលំដាប់លេខ១ ដែលបានមកបណ្តាក់នៅកម្ពុជាច្រើនជាងគេ មានចំណែករហូតដល់ជិត ៨០%។ 

ក្នុងពិធីសម្ពោធមជ្ឈមណ្ឌលត្រួតពិនិត្យឧបករណ៍ពិសេស របស់ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន នៅថ្ងៃទី៣១ ខែមីនានេះ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានថ្លែងថា ក្នុងរយៈពេល ៣ខែឆ្នាំ២០២៥ CDC បានអនុម័តគម្រោងវិនិយោគប្រមាណ ១៧២គម្រោង ដែលមានចំនួនលើសចំនួនគម្រោងវិនិយោគនៅឆ្នាំ២០២១ ទាំងមូល ដែលមានត្រឹមតែ ១៦៩គម្រោងប៉ុណ្ណោះ។ លោកបានបញ្ជាក់ថា នៅឆ្នាំ២០២៥ ក្នុងរយៈពេល ៣ខែនេះ ចំនួនក្រុមហ៊ុនវិនិយោគដែលមកពីប្រទេសចិន មានអត្រាប្រមាណជិត ៨០%។

លោកបន្តថា ក្នុងរយៈពេលជាង ១០ឆ្នាំមកនេះ ក្រុមហ៊ុនវិនិយោគិនរបស់ចិន ដែលបានមកបោះទុនវិនិយោគនៅកម្ពុជា បានឈរនៅលំដាប់លេខ១ និងលេខ២ស្ទើតែជារៀងរាល់ឆ្នាំ។ ជាក់ស្តែងនៅក្នុងឆ្នាំ២០២៤ ទុនវិនិយោគសរុបទាំងអស់ដែលមកពីប្រទេសចិន មានប្រមាណជា៥០% នៃគម្រោងដែលបានអនុម័ត។

ទន្ទឹមគ្នានេះ លោក ជា វុទ្ធី បានលើកទឹកចិត្តដល់វិនិយោគិនទាំងអស់ បន្តចូលរួមផ្សព្វផ្សាយពីបទពិសោធន៍ល្អៗ និងជោគជ័យក្នុងការវិនិយោគនៅកម្ពុជា ទៅកាន់វិនិយោគិនផ្សេងៗទៀត ដើម្បីរួមចំណែកជាមួយរាជរដ្ឋាភិបាល ក្នុងការទាក់ទាញវិនិយោគមកកាន់តែច្រើនបន្ថែមទៀត ជាពិសេសក្រុមហ៊ុនចិនតែម្តង៕

អត្ថបទ៖ ពិសិដ្ឋ រូបភាព៖ CDC