អាកាសយានដ្ឋានអន្តរជាតិតេជោ (TIA) កំពុងលេចរូបរាងយ៉ាងឆាប់រហ័ស ដែលជាដំណាក់កាលសំខាន់ក្នុងវិស័យហេដ្ឋារចនាសម្ព័ន្ធកម្ពុជា ក្រោមការវិនិយោគរបស់ក្រុមហ៊ុនលោកអ្នកឧកញ៉ា ពុង ឃាវសែ។ ថ្មីៗនេះដែរមានអ្នកជំនួញកំពូលៗមកពីសភាពាណិជ្ជកម្មអាមេរិក បារាំង និងអឺរ៉ុប បានអញ្ជើញទស្សនកិច្ចដំណើរការសាងសង់មុនពេលបើកដំណើរការនៅឆ្នាំនេះ ហើយផ្ដោតទៅលើការរីកចម្រើននៃការអភិវឌ្ឍន៍របស់កម្ពុជា ក្នុងគម្រោងទ្រង់ទ្រាយធំ។
Million Times 
អាកាសយានដ្ឋានអន្តរជាតិតេជោ (TIA) មួយនេះអាចចេញជារូបរាងឡើងដោយក្រុមហ៊ុន ខេមបូឌ៊ា អ៊ែរផត អ៊ិនវេសមិន ឯ.ក (Cambodia Airport Investment, Co. Ltd.) ដែលជាក្រុមហ៊ុនបណ្ដាក់ទុនរួមគ្នារវាង អូស៊ីអាយស៊ី គ្រុប (OCIC) និងរដ្ឋលេខាធិការដ្ឋានអាកាសចរស៊ីវិល (SSCA)។ ការអភិវឌ្ឍនេះឆ្លុះបញ្ចាំងពីការខិតខំប្រឹងប្រែង និងសមត្ថភាពរបស់លោកអ្នកឧកញ៉ា បណ្ឌិត ពុង ឃាវសែ ក្នុងការសាងសង់ និងបញ្ចប់គម្រោងធំៗ។
ប្រធានក្រុមប្រឹក្សាភិបាលក្រុមហ៊ុន OCIC មានប្រសាសន៍ថា៖ «គោលដៅរបស់យើងគឺតែងតែសាងសង់ឲ្យលើសពីទិដ្ឋភាពបច្ចុប្បន្ននេះ ដើម្បីបង្កើតជាមូលដ្ឋានគ្រឹះសម្រាប់អ្នកជំនាន់ក្រោយ។ គ្រប់គម្រោងដែលយើងអនុវត្តគឺជាជំហានឆ្ពោះទៅកាន់ប្រទេសកម្ពុជាកាន់តែរឹងមាំ និងមានការតភ្ជាប់»។
លោកអ្នកឧកញ៉ា ជាអ្នកជំនួញបានចាប់ផ្ដើមអាជីពធនាគាររបស់គាត់ក្នុងទសវត្សរ៍ឆ្នាំ ១៩៩០ ដោយបានបើកដំណើរការធនាគារកាណាឌីយ៉ា និងរួមចំណែកក្នុងការស្ថាបនាឡើងវិញវិស័យហិរញ្ញវត្ថុរបស់ប្រទេស។ នៅឆ្នាំ ២០០០ គាត់បានបង្កើត អូស៊ីអាយស៊ី គ្រុប (OCIC) ដោយពង្រីកទៅលើវិស័យអចលនទ្រព្យ និងហេដ្ឋារចនាសម្ព័ន្ធ ដែលការអភិវឌ្ឍរបស់លោកបានដើរតួនាទីយ៉ាងសំខាន់ក្នុងកំណើនសេដ្ឋកិច្ចកម្ពុជា។
ឆ្លងកាត់មក ២៥ ឆ្នាំមកនេះ លោកអ្នកឧកញ៉ា ពុង ឃាវសែ បានបង្កើតជាក្រុមហ៊ុន ក៏ដូចជាជំនួញជាច្រើនដូចជា អូស៊ីអាយស៊ី គ្រុប (OCIC) បានចាប់ផ្ដើមដំណើររបស់ខ្លួនក្នុងទសវត្សរ៍ឆ្នាំ ២០០០ ដោយការអភិវឌ្ឍន៍គម្រោងអចលនទ្រព្យនៅទូទាំងប្រទេសកម្ពុជា។ បន្ទាប់មកទៀត ការវិនិយោគលើតំបន់កោះពេជ្រ ក្រុងរណប អូឡាំព្យា និងកោះនរាជាដើម។ ដោយនេះសុទ្ធតែកកើតចេញពីក្រុមហ៊ុនមេរបស់លោកអ្នកឧកញ៉ា ពុង ឃាវសែ។
ខណៈដែលគម្រោងចុងក្រោយថ្មីៗនេះ គឺអាកាសយានដ្ឋានអន្តរជាតិតេជោ (TIA) ដែលដំណាក់កាលទី១ សម្រេចការសាងសង់ជាង ៩៥% ហើយ ដោយគ្រោងនឹងដាក់ដំណើរការ នៅខែកក្កដា ឆ្នាំ ២០២៥ ខាងមុខនេះ។ ព្រលានយន្តហោះថ្មីនេះ ជាគម្រោងវិនិយោគរបស់ក្រុមហ៊ុនសាជីវកម្មវិនិយោគទុននៅក្រៅប្រទេស (OCIC) ក្រោមទុនវិនិយោគ ១ ៥០០ លានដុល្លារអាមេរិក (ដំណាក់កាលទី១) ដែលត្រូវបានបើកការដ្ឋានសាងសង់នៅក្នុងឆ្នាំ ២០១៨។ TIA នេះ ត្រូវបានសាងសង់នៅលើផ្ទៃដីជាង ២ ៦០០ ហិកតា។ ព្រលាននេះ ជាប្រភេទព្រលាន 4F មានសមត្ថភាពទទួលបានការហោះហើរ ពីឆ្ងាយឆ្លងទ្វីបដោយអាចឲ្យយន្តហោះធុនធំរហូតដល់ Airbus A380-800 និង យន្តហោះ Boeing747-800 ចុះចតបាន។ នេះជាការចុះផ្សាយរបស់ The Phnom Penh Post ជាភាសាអង់គ្លេស នាថ្ងៃ ២៥ ខែមីនា ឆ្នាំ ២០២៥៕
អត្ថបទ៖ មេរ៉ា, រូបភាព៖ OCIC