លោកសេដ្ឋី លឹម ប៊ុនសួរ អគ្គនាយកក្រុមហ៊ុន អេហ្សេត ប៊ីលឌើរ ឯ.ក (AZ Builders Co., Ltd.) ដែលទទួលបានសិទ្ធិធ្វើការប្រតិបត្តិការ និងការថែទាំ បានអញ្ជើញសម្តេច ហ៊ុន ម៉ាណែត នាយករដ្ឋមន្ត្រីជាអធិបតីសម្ពោធកំពង់ផែទេសចរណ៍អន្តរជាតិកំពត នៅថ្ងៃទី៣ ខែមេសា ឆ្នាំ២០២៥ ស្ថិតនៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។
ដើម្បីឲ្យរបៀបវារៈប្រព្រឹត្តទៅបានដោយរលូន ប្រកបដោយសុវត្ថិភាព និងប្រសិទ្ធភាពខ្ពស់ លោកសេដ្ឋី លឹម ប៊ុនសួរ ចូលរួមកិច្ចប្រជុំត្រៀមរៀបចំពិធីសម្ពោធកំពង់ផែទេសចរណ៍អន្តរជាតិកំពត ជាមួយរដ្ឋមន្រ្តីក្រសួងសាធារណការ និងដឹកជញ្ជូន នារសៀលថ្ងៃចន្ទ ទី២៤ ខែមីនា ឆ្នាំ២០២៥។
Million Times 
កំពង់ផែទេសចរណ៍អន្តរជាតិខេត្តកំពត ត្រូវបានសាងសង់លើផ្ទៃដី ៤ហិកតា ស្ថិតក្នុងស្រុកទឹកឈូ ខេត្តកំពត ដែលចាប់ផ្ដើមសាងសង់នៅខែសីហា ឆ្នាំ២០១៨ និងសម្រេចរួចរាល់នាចុងឆ្នាំ២០២២ ដោយប្រើប្រាស់ថវិកាជាង ៩លានដុល្លារ ក្រោមគម្រោងហិរញ្ញប្បទានរបស់ធនាគារអភិវឌ្ឍន៍អាស៊ី (ADB) អាចតភ្ជាប់ប្រព័ន្ធផ្លូវទឹកដ៏សំខាន់រវាងខេត្តកំពត ខេត្តព្រះសីហនុ ខេត្តកែប ក៏ដូចជាតភ្ជាប់ផ្លូវទស្សនាចរសមុទ្រជាមួយបណ្ដាកំពង់ផែទេសចរណ៍នៅកោះត្រល់ ប្រទេសវៀតណាម និងបណ្ដាកំពង់ផែទេសចរណ៍នៅប្រទេសថៃជាដើម។
ក្រុមហ៊ុន អេហ្សេត ប៊ីលឌើរ របស់អ្នកឧកញ៉ា លឹម ប៊ុនសួរ បានទទួលសិទ្ធិធ្វើការប្រតិបត្តិការអាជីវកម្មកំពង់ផែទេសចរណ៍អន្តរជាតិខេត្តកំពត ដោយអនុវត្តដំណើរសាកល្បងក្នុងត្រីមាសទី៣ និងអនុវត្តការធ្វើប្រតិបត្តិការពេញលេញ ក្នុងត្រីមាសទី៤ ឆ្នាំ២០២៤កន្លងទៅ។
សូមជម្រាបជូនថា ដំបូងឡើយដំណើរការសាងសង់កំពង់ផែនេះ ត្រូវបានគ្រប់គ្រងដោយក្រសួងទេសចរណ៍ និងបានបើកការដ្ឋានសាងសង់កាលពីថ្ងៃទី០៨ ខែសីហា ឆ្នាំ២០១៨ ហើយគ្រោងបញ្ចប់នៅខែកុម្ភៈ ឆ្នាំ២០២០ ប៉ុន្តែដោយសារមូលហេតុបច្ចេកទេសសំណង់ ដំណើរការសាងសង់ត្រូវបានពន្យារពេល។ ដើម្បីជំរុញល្បឿន នៃការសាងសង់កំពង់ផែនេះ រាជរដ្ឋាភិបាលបានប្រគល់ភារកិច្ចជូនក្រសួងសាធារណការ និងដឹកជញ្ជូន គ្រប់គ្រងលើផ្នែកបច្ចេកទេស ថវិកា និងការងារសាងសង់ ដើម្បីអនុវត្តគម្រោងបន្ត ហើយដែលការសាងសង់នេះ ត្រូវបានបញ្ចប់ទាំងស្រុងកាលពីថ្ងៃទី៣០ ខែមិថុនា ឆ្នាំ២០២២៕
អត្ថបទ៖ ពិសិដ្ឋ រូបភាព៖ ក្រសួងសាធារណការ