អាកាសយានដ្ឋានអន្តជាតិតេជោ នឹងរៀបចំដំឡើងបដិមាព្រះពុទ្ធដ៏ធំមួយ ចំកណ្ដាលបរិវេណខាងក្នុងកន្លែងច្រកចេញ-ចូលបោះត្រាលិខិតឆ្លងដែន។ នេះបើតាមការឲ្យដឹងរបស់ឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC)។
នៅព្រឹកថ្ងៃអាទិត្យ ខែមីនា សម្តេចព្រះមហាសុមេធាធិបតី អំ លីមហេង សម្ដេចព្រះសង្ឃនាយកនៃគណៈមហានិកាយ និមន្តទតទីតាំងតម្កល់ព្រះពុទ្ធបដិមានៅអាកាសយានដ្ឋានអន្តរជាតិតេជោ សម្រាប់ជាទីគោរពសក្ការៈបូជារបស់បណ្តាពុទ្ធបរិស័ទជាតិ និងអន្តរជាតិធ្វើដំណើការឆ្លងកាត់នៅទីនោះ។
Million Times 
ការយាងពីសម្តេច អំ លីមហេង តបតាមការនិមន្តរបស់មហាសេដ្ឋី ពុង ឃាវសែ ម្ចាស់គម្រោង និងទទួលបដិសណ្ឋារកិច្ចធ្វើបទបង្ហាញដោយផ្ទាល់របស់លោកឧកញ៉ា ឆារស៍ វ៉ាន់។
គណៈសង្ឃនាយកនៃកម្ពុជា បានបញ្ជាក់ថា ការកសាងទីតម្កល់ព្រះពុទ្ធបដិមា ដើម្បីបង្ហាញពី រចនាបទ វប្បធម៌ និងការលើកតម្កើងព្រះពុទ្ធសាសនា ជាសាសនារបស់រដ្ឋ ទៅកាន់ភ្ញៀវជាតិ និងអន្តរជាតិ ដែលគ្រោងបេីកដំណេីរនាពេលឆាប់ៗខាងមុខនេះ។
សូមជម្រាបថា អាកាសយានដ្ឋានអន្តរជាតិតេជោ សម្រេចការសាងសង់បានចំនួន ៩៥% និងចំណាយទឹកប្រាក់អស់ ១៦០០លានដុល្លារគិតត្រឹមថ្ងៃទី២១ ខែមីនានេះ ហើយគ្រោងនឹងបើកដំណើរការក្នុងខែកក្កដា ឆ្នាំ២០២៥ខាងមុខនេះ។
ថ្លែងប្រាប់អ្នកសារព័ត៌មានមកពី ៥៦ស្ថាប័នធ្វើដំណើរទស្សនកិច្ចទៅកាន់ព្រលានយន្តហោះអន្តរជាតិតេជោ កាលពីសប្តាហ៍មុន ឧកញ៉ា ឆារស៍ វ៉ាន់ បានលើកឡើងថា ក្រៅពីចម្លាក់បដិមាចំនួន ២០០ នៅបរិវេណ អាកាសយានដ្ឋាន អន្តរជាតិតេជោ បច្ចុប្បន្នក្រុមហ៊ុនកំពុងរៀបចំដាក់បដិមាព្រះពុទ្ធដ៏ធំមួយ បន្ទាប់ពីនិមន្តសម្ដេចសង្ឃរាជ អំ លឹមហេង យាងទតទីតាំងដាក់បដិមាព្រះពុទ្ធ នៅអាកាសយានដ្ឋានអន្តរជាតិតេជោ។
លោកបានបញ្ជាក់ថា អាកាសយានដ្ឋានមានទំហំធំជាងគេនៅក្នុងប្រទេសកម្ពុជា ដែលបានសាងសង់ឡើងយ៉ាងប្រណីត និងគិតគូរគ្រប់ជ្រុងជ្រោយ អំពី បរិស្ថាន ដែលមានលក្ខណៈបៃតង និងមានភាពច្នៃប្រឌិតតូចៗ ដែលធ្វើឡើងឲ្យមានភាពទាក់ទាញជាពិសេសបានបង្ហាញអំពីវប្បធម៌ខ្មែរតាមរយៈ រូបចម្លាក់ ផ្ទះបុរាណ ភូមិវប្បធម៌ជាដើម។
លើសពីនេះ អាកាសយានដ្ឋាននឹងរៀបចំផ្លាស់ប្ដូរភូមិវប្បធម៌ពីខេត្តសៀមរាប មកដាក់ក្នុងអាកាសយានដ្ឋានអន្តរជាតិតេជោ ក្នុងគោលបំណងបង្កើតបរិយាកាសល្អសម្រាប់អ្នកដំណើរដែលរង់ចាំ ក៏ដូចជាភ្ញៀវទេសចរអាចចូលលេងកម្សាន្ត និងស្វែងយល់អំពីវប្បធម៌ អរិយធម៌របស់ប្រទេសកម្ពុជា៕
អត្ថបទ៖ ពិសិដ្ឋ រូបភាព៖ ផេកគណសង្ឃនាយក