ក្រុមហ៊ុនចំនួន ២ មានគម្រោងបោះទុនវិនិយោគប្រមូលទិញដំឡូងមី ដាំដុះដំណាំដំឡូងមី និងរោងចក្រកែច្នៃនៅក្នុងភូមិសាស្រ្តខេត្តពោធិ៍សាត់ ដើម្បីធ្វើការនាំចេញទៅកាន់ទីផ្សារប្រទេសចិន។ នេះបើតាមជំនួបអភិបាលខេត្តពោធិ៍សាត់ជាមួយគណៈប្រតិភូក្រមទាំងពីរ កាលពីថ្ងៃទី១៧ ខែមីនា ឆ្នាំ២០២៥។
ក្រុមហ៊ុនទាំង ២ ដែលមានគម្រោងនៅខេត្តពោធ៍សាត់នោះគឺក្រុមហ៊ុន Danong Agriculture Development និងក្រុមហ៊ុន Tianguan Global Cassava Processing Trading របស់ចិន។
Million Times 
លោក Zhao ShuJie នាយកប្រតិបត្តិក្រុមហ៊ុន Danong Agriculture Development បានឱ្យដឹងថា ក្រុមហ៊ុនរបស់លោក និងក្រុមហ៊ុន Tianguan Global Cassava Processing Trading មានគោលបំណងចង់វិនិយោគ ប្រមូលទិញដំឡូងមី ពីសំណាក់បងប្អូនប្រជាពលរដ្ឋក្នុងខេត្តពោធិ៍សាត់ ព្រមទាំងសាងសង់រោងចក្រមួយ ធ្វើការកែច្នៃដំឡូងមី ជាឥន្ទនៈអេតាណុល ដើម្បីនាំចេញទៅទីផ្សារប្រទេសចិន។ ម្យ៉ាងវិញទៀត ក្រុមហ៊ុន Tianguan Global Cassava Processing Trading ដែលមានភាគហ៊ុន ជាមួយក្រុមហ៊ុនដែលមានស្រាប់ ក្នុងទឹកដីនៃខេត្តពោធិ៍សាត់ ក៏មានបំណងចង់ពង្រីកមូលដ្ឋានដាំដុះ ដំឡូងមីរបស់ខ្លួនបន្ថែមទៀតផងដែរ។
លោកបញ្ជាក់ដែរថា សម្រាប់ដើមទុននៃការវិនិយោគក្នុងទឹកដីខេត្តពោធិ៍សាត់ គឺមានចំនួនទឹកប្រាក់រហូតទៅដល់ ២០០លានដុល្លារឯណោះ។
លោក ខូយ រីដា អភិបាលខេត្តពោធិ៍សាត់ បានសម្ដែងនូវការស្វាគមន៍ និងលើកទឹកចិត្ត ចំពោះបំណងប្រមូលទិញដំឡូងមី ពីសំណាក់បងប្អូនប្រជាពលរដ្ឋ ព្រមទាំងបង្កើតរោងចក្រកែច្នៃដំឡូងមី ក្នុងខេត្តពោធិ៍សាត់។ លោកបានបញ្ជាក់ថា រាជរដ្ឋាភិបាលកម្ពុជា ចង់ឃើញក្រុមហ៊ុនវិនិយោគ មានទាំងការដាំដុះ ការកែច្នៃ និងការនាំចេញដោយផ្ទាល់ ពីប្រទេសកម្ពុជាទៅកាន់ទីផ្សារពិភពលោក និយាយជារួមនឹងនិយាយដោយឡែក លោកក៏ចង់ឃើញការដាំដុះ ការកែច្នៃ និងការនាំចេញនេះ មានសន្ទុះពីខេត្តពោធិ៍សាត់ផងដែរ។
លោកសង្ឃឹមថា ការវិនិយោគនេះ នឹងផ្ដល់ផលប្រយោជន៍ជាច្រើនដល់ប្រជាកសិករក្នុងខេត្ត ជាពិសេសបង្កើនចំណូលរបស់ពួកគាត់ កាត់បន្ថយចំណាកស្រុក និងកំណើនសេដ្ឋកិច្ចខេត្ត។ ទន្ទឹមនឹងនេះ លោកនឹងផ្តល់ឱកាសសមរម្យជាថ្មីម្តងទៀត ដើម្បីជួបពិភាក្សាការងារនេះ ក្នុងការពន្លឿនកិច្ចដំណើរការគម្រោងឱ្យប្រព្រឹត្តទៅដោយរលូន៕
អត្ថបទ៖ សាងតេជៈ រូបភាព៖ រដ្ឋបាលខេត្តពោធិ៍សាត់