កាលពីថ្ងៃទី១៣ ខែកុម្ភៈ នាយករដ្ឋមន្ត្រីឥណ្ឌា Narendra Modi បានបំពេញទស្សនកិច្ចនៅសហរដ្ឋអាមេរិក ដោយបានជួបពិភាក្សាការងារជាមួយប្រធានាធិបតី Donald Trump នៅសេតវិមាន។
Million Times 
ក្នុងជំនួបមួយនោះ មេដឹកនាំឥណ្ឌាបានប្រកាសថា លោកនឹងប្ដេជ្ញាបង្កើនទំហំពាណិជ្ជកម្មទ្វេភាគី រវាងអាមេរិក និងឥណ្ឌាទ្វេដងត្រឹមឆ្នាំ២០៣០ ពោលគឺដាក់គោលដៅសម្រេចឲ្យបានរហូតដល់ ៥០០ពាន់លានដុល្លារ។ នេះបើតាមការចុះផ្សាយពីសារព័ត៌មាន Reuters។
លោក Modi បានអះអាងថា អាមេរិក និងឥណ្ឌាបានព្រមព្រៀងធ្វើការរួមគ្នា លើការអភិវឌ្ឍន៍វិស័យបច្ចេកវិទ្យាបញ្ញាសិប្បនិមិត្ត AI ការផលិតបន្ទះឈីប និងផ្ដោតសំខាន់លើសង្វាក់ផ្គត់ផ្គង់ធនធានរ៉ែសំខាន់ៗមួយចំនួន។
ជាមួយគ្នា រដ្ឋបាលប្រធានាធិបតី Trump ក៏បានប្រាប់បណ្ដាញសារព័ត៌មានថា មន្ត្រីអាមេរិក និងឥណ្ឌា កំពុងធ្វើការយ៉ាងខ្នះខ្នែង ដើម្បីសម្រេចបាននូវកិច្ចព្រមព្រៀងពាណិជ្ជកម្មទ្វេភាគីច្រើនជាងមុន និងសង្ឃឹមថា ពួកគេនឹងទទួលបានជោគជ័យធំមួយនៅក្នុងឆ្នាំនេះ៕
អត្ថបទ៖ Luffy រូបភាព៖ IndiaToday