ក្រសួងសេដ្ឋកិច្ច និងហិរញ្ញវត្ថុ សម្រេចបង្កើតក្រុមការងារបច្ចេកទេស សម្រាប់គម្រោងអភិវឌ្ឍន៍លំនៅឋានតម្លៃសមរម្យ ដើម្បីពិនិត្យលទ្ធភាពក្នុងការស្នើហិរញ្ញប្បទាន ផ្ដល់ការគាំទ្រដល់ការអភិវឌ្ឍន៍លំនៅឋានតម្លៃសមរម្យក្នុងករណីចាំបាច់។ ក្រោយទទួលបានដំណឹងភ្លាម អ្នកឧកញ៉ាបណ្ឌិត សំ សុខនឿន ក៏បានផ្ដល់បទសម្ភាសន៍គាំទ្រការសម្រេចបែបនេះ របស់រាជរដ្ឋាភិបាល។
Million Times 
បណ្ឌិត សំ សុខនឿន ដែលជាអ្នកជំនួញដ៏ល្បីបានបញ្ជាក់មកកាន់ Millions Times ថា លោកធ្លាប់បានលើកឡើងជារឿយៗពីតម្លៃលំនៅឋានតម្លៃសមរម្យនៅកម្ពុជា។ បច្ចុប្បន្នប្រជាជនភាគច្រើននៅកម្ពុជា ត្រូវការផ្ទះបែនោះ។ តែផ្ទុយទៅវិញ អ្វីដែលលោក និងអ្នកជំនាញ ក៏ដូចជាប្រជាជនផ្ទាល់មើលឃើញ កន្លងមកអ្នកអភិវឌ្ឍន៍នៅកម្ពុជា គឺមិនអាចសាងសង់ផ្ទះតម្លៃសមរម្យបានទេ។
ចំពោះមូលហេតុត្រូវបានអ្នកជំនាញផ្នែកអចលនទ្រព្យដ៏ប៉ិនប្រសព្វរូបនេះលើកឡើងថា មកពីតម្លៃដីនៅទីក្រុងភ្នំពេញ និងជាយ ឬជុំវិញក្រុងបានឡើងថ្លៃអស់ទៅហើយ។ យ៉ាងណាមិញការសាងសង់ផ្ទះតម្លៃសមរម្យទៅបាន អាស្រ័យលើផ្ទៃដីមានតម្លៃធូរថ្លៃ ដូចនេះហើយក្រុមអ្នកអភិវឌ្ឍន៍លំនៅឋានមិនអាចចំណេញ ឬសូម្បីរួចថ្លៃដើម។
អ្នកឧកញ៉ា សំ សុខនឿន ប្រធានក្រុមប្រឹក្សាភិបាលក្រុមហ៊ុន ខេធី ស្ទៀល ស្ត្រាក់ឈ័រ ឯ.ក បានរៀបរាប់ពីក្រុមមនុស្សដែលត្រូវការផ្ទះដែលមានតម្លៃសមរម្យ សម្រាប់ស្នាក់នៅ។ ក្នុងនោះមានដូចជា កម្មករកម្មការិនី កម្មករសំណង់ បុគ្គលិកក្រុមហ៊ុន គ្រូបង្រៀន ទាហាន អាជីវករទូទៅ សិស្សានុសិស្សមកពីតាមបណ្ដាខេត្តឡើងមកសិក្សានៅភ្នំពេញ។
ក្រុមមនុស្សទាំងប៉ុន្មានដែលបានរៀបរាប់ដូចខាងលើ សុទ្ធសឹងជាអ្នកត្រូវការលំនៅឋានដែលមានតម្លៃសមរម្យ ដែលមានការគាំទ្រពីរាជរដ្ឋាភិបាលនេះឯង។ អ្នកជំនួញដ៏ល្បីឈ្មោះទាំងក្នុង-ក្រៅប្រទេស និងជាសមាជិកថ្មីរបស់សភាពាណិជ្ជកម្មកម្ពុជា សប្បាយចិត្តនៅពេលឮដំណឹង មានគម្រោងអភិវឌ្ឍន៍លំនៅឋានតម្លៃសមរម្យនេះ។
តែតម្លៃដីក្នុង និងជុំវិញភ្នំពេញបានហក់ឡើងថ្លៃបាត់ទៅហើយ ដូចនេះដើម្បីអភិវឌ្ឍន៍លំនៅឋានមានតម្លៃសមរម្យទៅបាន អ្នកឧកញ៉ាបណ្ឌិត សំ សុខនឿន បានបញ្ជាក់ថា រាជរដ្ឋាភិបាលត្រូវកាត់បន្ថយ ឬលើកលែងពន្ធច្រើនប្រភេទដើម្បីឲ្យតម្លៃដើមនៃការសាងសង់មានតម្លៃទាប។ ការយល់ឃើញផ្ទាល់ខ្លួនរបស់វិនិយោគិនខ្មែររូបនេះ គឺរាជរដ្ឋាភិបាលគួរប្រគល់ដីរបស់រដ្ឋដល់ក្រុមហ៊ុន នោះក្រុមហ៊ុននឹងអាចសាងសង់បាននូវផ្ទះមានតម្លៃសមរម្យ ហើយប្រជាជនមានលទ្ធភាពទិញបាន។
លោកបណ្ឌិតបានអះអាងថែមទៀតថា នៅពេលដែលមានគម្រោងផ្ទះតម្លៃសមរម្យហើយ ប្រជាពលរដ្ឋច្រើន អាចមានលទ្ធភាពទិញបានផ្ទះទាំងនោះ ហើយការចំណាយប្រចាំថ្ងៃនឹងមានការថយចុះ នាំឲ្យជីវភាពកាន់តែប្រសើរឡើង។ ចំណុចល្អមួយទៀតពីការមានគម្រោងលំនៅឋានតម្លៃសមរម្យច្រើនកន្លែង ជួយឲ្យប្រជាពលរដ្ឋដែលមានជំនួញផ្សេងៗ មិនផ្លាស់ប្ដូរទីកន្លែងការងារ និងលទ្ធផលការងារកាន់តែប្រសើរ ជំនាញក៏កាន់តែតែអភិវឌ្ឍ ប្រាក់់ខែក៏កាន់តែកើនឡើង ដោយសារគ្មានការព្រួយបារម្ភច្រើន។
នៅពេលដែលប្រជាជនមានជំនាញគ្រប់គ្រាន់ហើយ ច្បាស់ណាស់វិនិយោគិនបរទេសក៏កាន់តែកើនឡើង មកបណ្ដាក់ទុនរកស៊ីនៅស្រុកខ្មែរ។ ដូច្នេះហើយទើបប្រមុខរាជរដ្ឋាភិបាល បានគិតគូរដល់ចំណុចបណ្ដុះបណ្ដាលជំនាញដល់កម្មករកម្មការិនី អ្នករកស៊ីក្រៅប្រព័ន្ធ មានជំនាញបច្ចេកទេស ហើយនៅពេលមានផ្ទះតម្លៃសមរម្យ ធ្វើឲ្យការបណ្ដុះបណ្ដាលជំនាញមានប្រសិទ្ធភាពខ្ពស់ ព្រោះពេលរៀនចេះហើយ មិនចាំបាច់ដូរទីតាំង ឬការងារ ដោយមានផ្ទះនៅជិតនោះស្រាប់៕
អត្ថបទ៖ មេរ៉ា៖ រូបភាព៖ Dr. Sam Soknoeun