ប្រមុខរាជរដ្ឋាភិបាលបានបង្ហើបឲ្យដឹងថា ក្រុមហ៊ុន BYD ដែលជាក្រុមហ៊ុនផលិតរថយន្តអគ្គិសនីដ៏ធំប្រចាំប្រទេសចិន នឹងមកបណ្ដាក់ទុនបើករោងចក្រនៅកម្ពុជា នាពេលខាងមុខ។
សម្តេច ហ៊ុន ម៉ាណែត នាយករដ្ឋមន្រ្តី ក្នុងពេលជួបសំណេះសំណាល និងពិសាភោជនាហារសាមគ្គីមហាគ្រួសារ សហគ្រាសធុនតូច មធ្យម និងសិប្បកម្មកម្ពុជា នៅល្ងាចថ្ងៃទី២៧ ខែមិថុនានេះ បានលើកឡើងថា សម្ដេចបានជជែកជាមួយឧបនាយករដ្ឋមន្ដ្រី ស៊ុន ចាន់ថុល ពាក់ព័ន្ធនឹងគម្រោងគ្រោងបណ្ដាក់ទុនរបស់ក្រុមហ៊ុន BYD នៅកម្ពុជាតែម្ដង។ សម្ដេចថ្លែងថា៖ «ក្រុមហ៊ុនរថយន្ដអគ្គិសនី BYD នឹងមកបណ្ដាក់ទុនបើករោងចក្រនៅកម្ពុជា»។
Million Times 
កាលពីពេលកន្លងទៅក្នុងដំណើរទស្សនកិច្ចទៅកាន់ប្រទេសចិន លោកស៊ុន ចាន់ថុល ក៏ជម្រុញលើកទឹកចិត្តឱ្យក្រុមហ៊ុន BYD បង្កើតរោងចក្រនៅកម្ពុជាផលិតគ្រឿងបង្គុំរថយន្ត ស្របនឹងកម្ពុជាមានកម្លាំងពលកម្មគ្រប់គ្រាន់ក្នុងការផ្ដល់ជូនក្រុមហ៊ុន។
ជាមួយគ្នានោះដែរ ក្រុមហ៊ុន BYD ក៏បានប្រាប់ពីគម្រោងពង្រីកអាជីវកម្មរបស់ខ្លួននៅកម្ពុជា។ ក្នុងឆ្នាំ២០២៣កន្លងទៅ ក្រុមហ៊ុនកំពុងស្ថាបនាមណ្ឌលផ្ដល់សេវារបស់ខ្លួនចំនួន២ និងបន្ទប់តាំងបង្ហាញរថយន្តចំនួន២ ព្រមទាំងត្រៀមបើកឱ្យប្រើប្រាស់បន្ទប់តាំងបង្ហាញរថយន្តថ្មីមួយកន្លែងទៀតនៅខេត្តសៀមរាបក្នុងឆ្នាំ២០២៤ ហើយក្រោយពីការពង្រីកអាជីវកម្មនេះក៏នឹងផ្តល់ឱកាសការងារចំនួន ៣០០កន្លែងបន្ថែមជូនដល់កម្ពុជា។
លើសពីនេះទៅទៀត រថយន្តប្រភេទថ្មីផ្សេងៗទៀតក៏នឹងត្រូវបានក្រុមហ៊ុននាំយកចូលមកកាន់ទីផ្សាររបស់កម្ពុជាផងដែរ ដោយហេតុថាក្រុមហ៊ុនបានមើលឃើញអំពីស្ថិរភាពនយោបាយ សក្តានុពលសេដ្ឋកិច្ច ការរីកចម្រើននៃហេដ្ឋារចនាសម្ព័ន្ធសង្គម គោលនយោបាយឌីជីថលកម្ពុជា និងពិសេសការកើនឡើងយ៉ាងឆាប់រហ័សនៃចរាចរណ៍យានយន្តអគ្គីសនីក្នុងប្រទេសកម្ពុជា៕
អត្ថបទ៖ ផល កុសល រូបភាព៖ ក្រុមព័ត៌មានសម្តេចធិបតី