សមិទ្ធផលថ្មីមួយទៀត នឹងត្រូវរដ្ឋាភិបាលបើកការដ្ឋានសាងសង់ នៅថ្ងៃចន្ទដើមសប្ដាហ៍ក្រោយ នោះគឺស្ពានអាកាសភ្លោះ ត្រង់ចំណុចផ្លូវប្រសព្វមហាវិថីសម្តេចតេជោ ហ៊ុនសែន ឬហៅថាផ្លូវ ៦០ម៉ែត្រ និងផ្លូវជាតិលេខ ២។ ពិធីបើកការដ្ឋាននេះ នឹងត្រូវធ្វើឡើងក្រោមអធិបតីភាពរបស់សម្ដេច ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី ១៧ ខែមិថុនា ឆ្នាំ ២០២៤។

ស្ពានអាកាសភ្លោះនេះ ត្រូវបានគេរំពឹងទុកថា ជាហេដ្ឋារចនាសម្ព័ន្ធមួយដ៏សំខាន់ ដែលតភ្ជាប់ពីចរាចរណ៍ពីរាជធានីភ្នំពេញ ទៅកាន់អាកាសយានដ្ឋានអន្តរជាតិតេជោ ស្ថិតនៅស្រុកកណ្តាលស្ទឹង ខេត្តកណ្ដាល ហើយបើតាមគម្រោង​អាកាសភ្លោះនេះ គឺក្រុមហ៊ុន Cambodia Airport Investment (CAIC) របស់អ្នកឧកញ៉ា ពុង ឃាវសែ ជាអ្នកចេញថវិកាសាងសង់ទាំងស្រុង។

ដើម្បីឲ្យការបើកការដ្ឋានសាងសង់ស្ពានអាកាសភ្លោះនេះ ដំណើរការទៅដោយរលូន និងមានសណ្ដាប់ធ្នាប់នោះ, មន្ទីរសាធារណការ និងដឹកជញ្ជូន ខេត្តកណ្ដាល កាលពីថ្ងៃទី ១៤ ខែមិថុនា បានចេញសេចក្ដីជូនដំណឹងមួយ ស្តីពី ការបិទចរាចរយានជំនិះគ្រប់ប្រភេទ នៅលើកំណាត់ផ្លូវជាតិលេខ ២ និងមហាវិថីសម្តេចតេជោ ហ៊ុនសែន ស្ថិតក្នុងក្រុងតាខ្មៅ ខេត្តកណ្តាល នៅថ្ងៃបើកការដ្ឋាននោះ ចាប់ពីម៉ោង ០ និង០០នាទីរំលងអាធ្រាត្រ រហូតដល់ម៉ោង ១៣ និង ០០នាទីរសៀលថ្ងៃដដែល។

ចំពោះយាន្តជំនិះគ្រប់ប្រភេទ ដែលមានបំណងធ្វើដំណើរទៅមកតាមទីតាំង បើកការដ្ឋានសាងសង់ស្ពានអាកាសភ្លោះនេះ ត្រូវធ្វើដំណើរវាងតាមផ្លូវក្រវ៉ាត់ក្រុងទី ៣ ផ្លូវក្រវ៉ាត់ក្រុងទី ២ និងផ្លូវជាតិលេខ ២១។ នេះបើតាមការគូសបញ្ជាក់របស់មន្ទីរសាធារណការ និងដឹកជញ្ជូន ខេត្តកណ្ដាល៕

អត្ថបទ៖ វីរៈ រូបភាព៖ មន្ទីរសាធារណការ និងដឹកជញ្ជូន ខេត្តកណ្ដាល