ក្រុមអ្នកជំនួញជាន់ខ្ពស់អាមេរិក The Business Roundtable ដែលប្រមូលផ្ដុំដោយ CEO នៃក្រុមហ៊ុនកំពូលៗច្រើនជាង ២០០ក្រុមហ៊ុននៅអាមេរិក បានព្រមានថា សេដ្ឋកិច្ចរបស់អាមេរិកកំពុងប្រឈមនឹងផលប៉ះពាល់ខ្លាំង ដោយសារវិធានការទារពន្ធគយរបស់ប្រធានាធិបតី Donald Trump។
Million Times 
លោក Joshua Bolten សមាជិកនៃក្រុម Business Roundtable បាននិយាយប្រាប់ទីភ្នាក់ងារព័ត៌មាន CNBC ថា វិធានការទារពន្ធគយសងសឹករបស់ប្រធានាធិបតី Trump ចន្លោះពី ១០% ទៅ ៥០% កំពុងបង្កហានិភ័យធ្ងន់ធ្ងរ ចំពោះរោងចក្រផលិតនៅអាមេរិក បុគ្គលិក ជីវភាពរបស់ប្រជាជន និងការនាំចេញជាដើម។
លោក Bolten បន្ថែមទៀតថា ផលប៉ះពាល់ចំពោះសេដ្ឋកិច្ច នឹងកាន់តែអាក្រក់ទៅៗ ដរាបណាវិធានការទារពន្ធគយយ៉ាងសម្បើមរបស់លោក Trump បន្តអនុវត្ត ហើយវាអាចនឹងបង្កជាផលប៉ះពាល់នឹកស្មានមិនដល់ បើសិនជាបណ្ដាប្រទេសទាំងនោះ អនុវត្តវិធានការសងសឹកពន្ធ ចំពោះសហរដ្ឋអាមេរិកវិញ។
សមាជិកនៃក្រុម Business Roundtable រូបនេះអះអាងទៀតថា បច្ចុប្បន្នពួកគេកំពុងស្នើសុំការសហការពីរដ្ឋបាល និងដៃគូពាណិជ្ជកម្មធំៗ ក្នុងការធ្វើការរួមគ្នា ដើម្បីសម្រេចបាននូវកិច្ចព្រមព្រៀង ដែលអាចលុបចោលនូវវិធានការពន្ធគយទាំងនេះ។
គួរជម្រាបបន្តិចថា បន្ទាប់ពីប្រធានាធិបតី Donald Trump ទម្លាយពីផែនការទារពន្ធគយយ៉ាងសម្បើមនោះ ទីផ្សារហ៊ុនអាមេរិកធំៗដូចជា Nasdaq បានស្រុតចុះ ៣,៣%ភ្លាមៗ និងធ្វើឲ្យក្រុមហ៊ុនបច្ចេកវិទ្យាធំៗអាមេរិកចំនួន៧ ខាតបង់ទ្រព្យសម្បត្តិសរុបប្រហែល ៧៦០ពាន់លានដុល្លារ រយៈពេលតែប៉ុន្មានម៉ោងប៉ុណ្ណោះ៕
អត្ថបទ៖ Luffy រូបភាព៖ Business Roundtable