វេទិកាអភិវឌ្ឍន៍ចិន China Development Forum (CDF) ដែលជាសន្និសីទអន្តរជាតិដ៏សំខាន់របស់ប្រទេសចិនក្នុងឆ្នាំនេះ បានចាប់ផ្តើមនៅទីក្រុងប៉េកាំងកាលពីថ្ងៃអាទិត្យ ដោយទាក់ទាញការចូលរួមយ៉ាងច្រើនពីអង្គការអន្តរជាតិ ព្រមទាំងនាយកប្រតិបត្តិមកពីក្រុមហ៊ុនយក្សពហុជាតិចំនួន ៨៦ មកពី ២១ ប្រទេសបានចូលរួម ហើយភាគច្រើនជាក្រុមហ៊ុនរបស់សហរដ្ឋអាមេរិក រួមមាន Apple, Corning Inc និង Mercedes-Benz Group ដែលគូសបញ្ជាក់ពីភាពទាក់ទាញដ៏ធំសម្បើម និងសក្តានុពលដ៏ធំនៃសេដ្ឋកិច្ចធំបំផុតទីពីររបស់ពិភពលោក។

Global Times បានផ្សាយថា នាយករដ្ឋមន្ត្រីចិន លោក Li Qiang បានធ្វើការកត់សម្គាល់នៅក្នុងសុន្ទរកថាសំខាន់នាពិធីបើកវេទិកាអភិវឌ្ឍន៍ចិនឆ្នាំ ២០២៥ ដោយបានសន្យាថានឹងមានការបើកទូលាយ និងកិច្ចសហប្រតិបត្តិការជឿនលឿនទៅមុខ ចំពេលមានការកើនឡើងអស្ថិរភាព និងភាពមិនប្រាកដប្រជាជាសកល។

លោកបាននិយាយថា ប្រទេសចិននឹងបន្តស្វាគមន៍សហគ្រាសមកពីជុំវិញពិភពលោកដោយបើកចំហ ពង្រីកទីផ្សារបន្ថែមទៀត ដោះស្រាយយ៉ាងសកម្មនូវកង្វល់របស់ធុរកិច្ច និងជួយសម្រួលដល់ការធ្វើសមាហរណកម្មកាន់តែស៊ីជម្រៅនៃសហគ្រាសដែលផ្តល់មូលនិធិពីបរទេសទៅក្នុងទីផ្សារចិន។

លោកបាននិយាយថា ប្រទេសចិននឹងការពារពាណិជ្ជកម្មសេរី និងរួមចំណែកដល់ដំណើរការរលូន និងស្ថិរភាពនៃខ្សែសង្វាក់ឧស្សាហកម្ម និងការផ្គត់ផ្គង់សកល។

ប្រទេសចិនបានកំណត់ទិសដៅកំណើនពេញមួយឆ្នាំរបស់ខ្លួននៅប្រហែល ៥ភាគរយសម្រាប់ឆ្នាំ២០២៥។ លោក Li បានថា ការសម្រេចចិត្តនេះឆ្លុះបញ្ចាំងទាំងការយល់ដឹងយ៉ាងជ្រាលជ្រៅរបស់ប្រទេសចិនអំពីលក្ខខណ្ឌសេដ្ឋកិច្ចជាមូលដ្ឋាន និងទំនុកចិត្តយ៉ាងខ្លាំងចំពោះសមត្ថភាពអភិបាលកិច្ច និងសក្តានុពលអភិវឌ្ឍន៍នាពេលអនាគត ហើយបានសន្យាថានឹងខិតខំប្រឹងប្រែងពង្រឹងការគាំទ្រគោលនយោបាយ ខណៈពេលដែលជំរុញកម្លាំងទីផ្សារដើម្បីសម្រេចបាននូវគោលដៅ។

លោក Jeffrey Sachs សាស្ត្រាចារ្យនៃសាកលវិទ្យាល័យ Columbia បានប្រាប់ Global Times នៅខាងក្រៅវេទិកាថា “នាយករដ្ឋមន្ត្រីបានផ្តល់ព័ត៌មានពិត និងគួរឱ្យរំភើបរបស់ប្រទេសចិន។ ហើយវាល្អណាស់” ។

លោក Sachs បាននិយាយថា ការសង្កត់ធ្ងន់របស់លោកនាយករដ្ឋមន្ត្រី Li លើភាពជឿនលឿននៃបច្ចេកវិទ្យារបស់ប្រទេសចិន និងការបើកចំហរបស់ប្រទេសចិនចំពោះពិភពលោកសម្រាប់កិច្ចសហប្រតិបត្តិការ ពាណិជ្ជកម្ម និងការវិនិយោគ គឺជាសារវិជ្ជមានដែលទទួលបានយ៉ាងខ្លាំងនៅក្នុងវេទិកានេះ។ លោកបាននិយាយថា “ពួកគេគឺជាមូលដ្ឋានសម្រាប់សុទិដ្ឋិនិយមដ៏អស្ចារ្យដែលថាកំណើនយ៉ាងឆាប់រហ័សរបស់ប្រទេសចិននឹងបន្តនៅលើមូលដ្ឋាននៃសេដ្ឋកិច្ចប្រកបដោយភាពច្នៃប្រឌិតខ្ពស់ដែលផលិតទំនិញ និងសេវាកម្មដែលពិភពលោកទាំងមូលត្រូវការ” ។

លោក Wendell P. Weeks នាយកប្រតិបត្តិក្រុមហ៊ុនអាមេរិក Corning Inc បាននិយាយថា “ប្រាកដណាស់ យើងមានទំនុកចិត្តសម្រាប់ការអភិវឌ្ឍន៍របស់ប្រទេសចិន។ យើងបានបណ្តាក់ទុនជាប់លាប់ជាច្រើនទសវត្សរ៍នៅក្នុងប្រទេសចិន ហើយយើងនឹងបន្តសម្រាប់ទសវត្សរ៍ខាងមុខ”។ 

លោក Michael Nelson នាយកប្រតិបត្តិនៃក្រុមហ៊ុនអាមេរិក Amway បាននិយាយនៅខាងក្រៅវេទិកា ថាក្រុមហ៊ុនគ្រោងវិនិយោគ ២,១ ពាន់លានដុល្លារនៅក្នុងទីផ្សារប្រទេសចិនក្នុងរយៈពេល ៥ ឆ្នាំខាងមុខ។ ទន្ទឹមគ្នានេះលោកថា ក្រុមហ៊ុនកំពុងតាមដានផលប៉ះពាល់នៃពន្ធគយរបស់សហរដ្ឋអាមេរិកផងដែរ។

នាយកប្រតិបត្តិក្រុមហ៊ុន Apple លោក Tim Cook ក៏បានចូលរួមក្នុងវេទិកានេះ ហើយអំឡុងពេលនេះ លោកក៏បានពិភាក្សាជាមួយលោក Ren Hongbin ប្រធានក្រុមប្រឹក្សាចិនសម្រាប់ការលើកកម្ពស់ពាណិជ្ជកម្មអន្តរជាតិ។

គួរឲ្យដឹងថា វេទិកាអភិវឌ្ឍន៍ប្រទេសចិនឆ្នាំ ២០២៥ China Development Forum (CDF) គ្រោងនឹងប្រព្រឹត្តទៅចាប់ពីថ្ងៃទី ២៣ ដល់ថ្ងៃទី ២៤ ខែមីនា ក្រោមប្រធានបទ៖ “ការរំសាយសន្ទុះអភិវឌ្ឍន៍សម្រាប់កំណើនប្រកបដោយស្ថិរភាពនៃសេដ្ឋកិច្ចសកល” “Unleashing Development Momentum for Stable Growth of Global Economy.” ៕

អត្ថបទ៖ សារ៉ាយ រូបភាព៖ cnsphoto