នាយករដ្ឋមន្ត្រីចិនលោក Li Qiang បានជំរុញឱ្យប្រទេសនានាបើកទីផ្សាររបស់ពួកគេដើម្បីប្រឆាំងនឹងការកើនឡើងនៃអស្ថិរភាព និងភាពមិនច្បាស់លាស់។ ការលើកឡើងនេះក្នុងវេទិកាធុរកិច្ចនាទីក្រុងប៉េកាំងនៅថ្ងៃអាទិត្យនេះ ខណៈដែលប្រទេសចិនបានត្រៀមលក្ខណៈសម្រាប់ពន្ធបន្ថែមរបស់សហរដ្ឋអាមេរិក។
ប្រព័ន្ធផ្សព្វផ្សាយរដ្ឋបានឲ្យដឹងថា “នៅក្នុងពិភពលោកដែលបែកបាក់កាន់តែខ្លាំងនាពេលបច្ចុប្បន្ននេះ ជាមួយនឹងការកើនឡើងនៃអស្ថិរភាព និងភាពមិនច្បាស់លាស់ វាកាន់តែចាំបាច់សម្រាប់ប្រទេសនានាក្នុងការបើកទីផ្សារ និងសហគ្រាសរបស់ពួកគេ … ដើម្បីទប់ទល់នឹងហានិភ័យ និងបញ្ហាប្រឈមនានា” ។
Million Times 
សារព័ត៌មាន Reuters បានផ្សាយថា ក្នុងវេទិកាធុរកិច្ចនាទីក្រុងប៉េកាំងនៅសប្តាហ៍នេះ មាននាយកប្រតិបត្តិបរទេសជាច្រើនបានចូលរួម ដូចជា មហាសេដ្ឋី Tim Cook ម្ចាស់ក្រុមហ៊ុន Apple , លោក Cristiano Amon CEO ក្រុមហ៊ុន Qualcomm , លោក Pascal Soriot CEO នៃក្រុមហ៊ុន AstraZeneca និងកំពូលអ្នកមានអារ៉ាប់ លោក Amin Nasser CEO ក្រុមហ៊ុន Saudi Aramco ខណៈប្រភពខ្លះនិយាយថា នាយកប្រតិបត្តិបរទេសទាំងនោះនឹងជួបជាមួយប្រធានាធិបតីចិន Xi Jinping ។
ការរៀបចំវេទិកាធុរកិច្ចនេះ ទីក្រុងប៉េកាំងចង់ទាក់ទាញការវិនិយោគពីបរទេសនៅពេលមានភាពតានតឹងផ្នែកភូមិសាស្ត្រនយោបាយកើនឡើង ខណៈដែលអ្នកបង្កើតគោលនយោបាយព្យាយាមជំរុញការប្រើប្រាស់ក្នុងស្រុកដើម្បីទូទាត់ថ្លៃពន្ធថ្មីរបស់សហរដ្ឋអាមេរិក។
នាយករដ្ឋមន្រ្តីចិនលោក Li បាននិយាយថា “យើងនឹងផ្តោតលើការរួមបញ្ចូលការពង្រឹងគោលនយោបាយជាមួយនឹងកម្លាំងទីផ្សារជំរុញ”។ នេះបើយោងតាមរបាយការណ៍របស់សារព័ត៌មាន Xinhua ។
លោក Li អះអាងថា “យើងនឹងអនុវត្តគោលនយោបាយម៉ាក្រូសេដ្ឋកិច្ចកាន់តែសកម្ម និងសន្យា បង្កើនការកែសម្រួលប្រឆាំងវដ្ត និងណែនាំគោលនយោបាយបន្ថែមថ្មីនៅពេលចាំបាច់”។ ទន្ទឹមគ្នានេះ លោក Li បានសម្តែងក្តីសង្ឃឹមថា សហគ្រិននឹងក្លាយជាអ្នកការពារដ៏រឹងមាំ និងអ្នកផ្សព្វផ្សាយនៃសកលភាវូបនីយកម្ម និងប្រឆាំងនឹងលទ្ធិឯកតោភាគី និងការការពារនិយម។
Reuters ចុះផ្សាយដោយយោងប្រភពមួយបានឱ្យដឹងថា មាននាយកប្រតិបត្តិអាមេរិកតិចជាងមុន បានចូលរួមកិច្ចប្រជុំកំពូលកាលពីឆ្នាំមុន ដោយសារភាពតានតឹងផ្នែកភូមិសាស្ត្រនយោបាយរវាងទីក្រុងប៉េកាំង និងវ៉ាស៊ីនតោនកើនឡើង៕
អត្ថបទ៖ សារ៉ាយ រូបភាព៖ Xinhua